Enkuantu, Parlamentu Nasional aprova ona lei refere iha loron 14 Fevereiru 2023 ho resultadu votasaun final global votus a-favor 38, abstensaun 0, kontra 0.

Portavóz ADTL, Carceres Nunes Arcatura liu husi konferensia imprensa hatete, husi organizasaun ne'ebé servisu ba defeza direitu EhD iha Timor-Leste hato'o apresiasaun no louva PN, STAE no CNE.

Tanba PN altera ona lei eleisaun parlamentar hodi kria kondisaun ba ema ho difesiensia liuliu fasilita Matrix Braille ka Template Braille ba EhD matan nune'e bele vota mesak.

"Apresia no louva Parlamentu Nasional ne'ebé aprova ona lei eleisaun parlamentar liu husi komisaun A ne'ebé konsidera organizasaun defisiénsia hodi konsulta kona ba alterasaun lei refere,”dehan nia iha Salaun ADTL, Maskarenhas, Balide, tersa (28/02).

No nune’e, ADTL mós hato'o agradese ba orgaun ténkinu STAE ho CNE ne'ebé iha pozisaun hanesan ho organizasaun defisiénsia hodi kria kondisaun ba EhD liu husi alterasaun lei refere.

"Ami nia esperansa ba eleisaun parlamentar ba tinan ida ne'e tenki inkluzivu no asesivel ba sidadaun hotu, liliu sidadaun ho defisiénsia,” tenik nia.

Nia esplika, Konstituisaun RDTL artigu 65 ne’ebé garante sidadaun hotu nia direitu ba partisipasaun polítika no la hare ba kor, rasa, etniku, kondisaun fisiku no mós mental.

Aleinde, iha Konstituisaun RDTL artigu 69 ko’alia kona-ba eleisaun ne'ebé sita eleisaun ne’e ho livre, sekretu, seguru no ema ida votu ida.

Baze hirak ne'e garante tebes direitu ema ho defisiénsia atu hola parte iha demokrasia no eleisaun iha Timor-Leste.

Ho nune'e, ADTL rekomenda ba Prezidente Repúblika atu promulga lei ne'e, hodi ekipa tékniku STAE ho CNE bele kordena hodi kria kondisaun ba EhD hodi asesu ba eleisaun Parlamentar iha 21 Maiu 2023.

ADTL mós husu ba reprezentante ema ho defisiénsia iha Palasiu Prezidensial atu informa kestaun asesibilidade ba ema ho defisiénsia asesu iha eleisaun parlamentar ba Prezidente Repúblika.