“Ha’u hamutuk ho Primeiru-Ministru nu’udár órgaun Estadu, líder nasionál hakarak hato’o ami-nia votus natal kmanek bá família hotu-hotu iha Timor-Leste, timoroan sira iha rai-li’ur, sira ne’ebé moras iha ospitál, iha prizaun no iha ne’ebé de’it. Ami hato’o mós votus tinan foun bá hotu-hotu, tinan foun sei di’ak liu-tán tinan 2024. Haku’ak bo’ot,” Mensajem ne'e Xefe Estadu hato'o liu husi komunikadu ne’ebé Online INDEPENDENTE asesu iha Pajina Gabinete PM, kinta (19/12).
Iha fatin hanesan, Primeiru-Ministru Kay Rala Xanana Gusmão mós relembra katak, joven sira iha tinan kotuk hotu-hotu kontente tanba iha periúdu natal la akontese buat ruma to’o simu tinan foun 2024.
Ho ida-ne’e, Primeiru-Ministru hodi Prezidente Repúblika nia naran fiar tebes katak, joven sira iha bairru sira kaer metin mensajen Sua Santidade Papa Francisco bainhira vizita Timor, joven sira rasik mak hatudu bá mundu katak, pás no estabilidade iha joven sira-nia liman no hahalok.
“Papa to’o tiha Vatikanu no bá vizita fali rai seluk mós kontinua temi Timor-Leste. Papa kontente bainhira hala’o enkontru ho joven sira iha CCD. Kontente tanba la akontese buat ida. Ne’e duni, apelu bo’ot bá joven sira iha Timor laran tomak, liu-liu iha Dili, hadomi malu bá, kaer metin ita-nia nasaun ninia orgullu ne’ebé Papa rasik kuandu bá fatin seluk sempre temi,” Xanana Gusmão dezeja.
Entretantu, loron mundiál juventude selebra ona iha Portugal iha tinan ne’e, no tinan 2025 sei selebra iha Korea, Papa Francisco no joven timoroan mós sei partisipa, tanba ne’e, Primeiru-Ministru husu atu buka hametin nafatin mundu ninia kuiñesimentu kona-bá Timor, rai ida ne’ebé sei iha problema barak duni, maibé rai ida ne’ebé joven sira kaer metin pás no estabilidade.
Enkuantu, Xefe Governu dezeja natal kmanek bá povu tomak liu-liu bá joven sira no tinan foun 2025 ne’ebé bele fó tempu, obrigasaun no misaun bá instituisaun Estadu sira bele kumpri hodi hadi’a povu nia moris no lori rai ne’e ba oin.
