Iha entervista Xefe Operasaun FALINTIL-Forsa Defeza Timor-Leste (F-FDTL) Koronel João da Costa Esteves hatete, F-FDTL husi Kuartel Jenerál realiza ezersísiu marsa forsada ida ne’e husi Nasuta to’o Tasi Tolu.

“Ohin ami halo marsa Forsada husi Nasuta to’o iha kuartel ne’e hanesan programa ida ne’ebé tama iha treinamentu operasionál matrix anual nian,” dehan Xefe Operasaun FALINTIL-Forsa Defeza Timor-Leste (F-FDTL) Koronel João da Costa Esteves liu husi komunikadu ne’ebé Online INDEPENDENTE asesu iha pajina Relasaun Informasaun Públika F-FDTL, iha minutu 15 liu bá, kinta ne’e (19/12).

Marsa Forsada ne’e la’os kuartel Jenerál mak halo maibé kada Komponente no Unidade sira hotu iha programa rasik inklui mós ezersísiu sira seluk ne’ebé hahú ona iha fulan Janeiru to’o fulan ikus ne’e.

Marsa ne’e ho nia objetivu atu koko psikologikamente bá Forsas Armadas hotu-hotu no bá individualmente no hare mós bá espiritu korpu no espiritu kamaradajen bá militár hotu-hotu ne’ebé halo marsa nomós Ezersísiu sira séluk.

“Marsa Forsada ida ne’e, komandu bele halo avaliasaun katak militár sira ne’e iha forte moral no tenke iha espiritu kamaradajen no espírito korpu ka lae, bele mós sukat saúde militár idak-idak nian, atu nune’e bele halo protidaun operasionál nian bá militár ida ne’ebé hola parte hanesan área defeza fizikamente ladun garantidu, mas oinsá nia bele asegura ninia misaun ne’ebé konsagra iha artigu 146, tanba ne’e mak presiza hare ita nia forsa sira nia fizikamente no moralmente fó protidaun operasionál bá ita nia militár hotu-hotu.”tenik Koronel João da Costa Esteves.

Entretantu, membru FALINTIL-Forsa Defeza Timor-Leste (F-FDTL) hamutuk atus ida resin mak hola parte iha ezersísiu marsa forsada ida ne’e, nune’e bá oin sei efetivu sei liu ida ne’e, alende ne’e iha marsa forsada ida ne’e hetan seguransa husi Unidade Polisia Militár (PM) no seksaun ida unidade Apoiu Kuartel Jenerál.