Prezidente Repúblika, Francisco Guterres ‘Lú-Olo’, kestiona kona-ba lei orgánika Governu nian. Ne’e duni, husu ba Primeiru Ministru, Taur Matan Ruak atu hadi’a fali lei ne’e.

“Prezidente Repúblika bolu ha’u haree iha Lei Orgánika Governu nian iha buat balun ne’ebé Xefe Estadu hakarak ami hadi'a”, tenik nia, hafoin enkontru regulár ho Xefe Estadu, iha Palásiu Prezidensiál, Bairru-Pité, horisehik.

Maski nune’e, Primeiru Ministru lori informasaun balun ba Xefe Estadu hodi ajusta ba Lei Orgánika ne’e antes hetan promulgasaun.

Nia esplika, Orsamentu Jerál Estadu (OJE) prioridade ba Governu, maibé importante liu maka Lei Orgánika Governu nian, tanba laiha maka sei difikulta ba servisu governu nian iha ezekusaun OJE.

PM Taur konfesa katak, Xefe Estadu mós kompromete atu promulga Lei Orgánika ne’e iha tempu badak nia laran bainhira hetan ona revizaun husi Governu.

Nia esplika, Governu hakarak halo buat hotu-hotu tuir konstituisaun tanba ne’e forma ida atu apoiu Prezidente Repúblika hodi bele promulga lalais dokumentu ka orsamentu ruma ne’ebé aprezenta.

Diverjénsia ideia entre Prezidente Repúblika no Governu la’ós foin primeira-vés, antes ne’e Xefe Estadu mós la konkorda ho lista membru governu balun ne’ebé Xefe Estadu indijita. Nune’e, to’o agora sei kontinua sai polémika no seidauk hetan tomada-de-pose.

Problema seluk maka kona-ba Lei Númeru 1/V kona-ba transferénsia Fundu Petrolíferu ba Dotasaun Orsamentu Temporaria ho totál tokon $140, ne’ebé Prezidente Repúblika deside lori ba Tribunál Rekursu hodi halo fiskalizasaun preventiva.

Maski nune’e, ikus mai Tribunál deside katak lei ne’e la viola konstituisaun no Xefe Estadu mós promulga ona lei ne’e hodi bele halo transferénsia orsamentu.