Governu konxiente katak ne’e devér sira nian hodi rezolve. Ne’e duni, husu ba komunidade sira atu labele preokupa tanba Governu garante to’o 21 Agostu 2018 ba oin ahi kontinua lakan.
Ministru Reforma Lejizlativa Asuntu Parlamentár, Fidelis Magalhães hateten, Governu halo esforsu tomak hodi asegura atu eletrisidade labele taka iha territóriu tomak.
Nia esplika. fallansu tékniku entre Governu ho kompañia fornesidór kombustivel ba sentrál elétrika, nune’e sei buka dalan hodi rezolve preokupasaun sobre kombustivel.
Ne’e duni, Governu haksoru malu ona ho kompañia, tanba ne’e garante sei la hapara fornesimentu mina ba Sentrál Elétriku Hera no Betanu. Ne’e duni, povu territóriu tomak labele ta'uk.
Entretantu, Deputadu Bankada Partidu Demokrátiku (PD), Adriano do Nascimento, ezije katak eletrisidade sei mate iha territóriu tomak ka oinsá? Povu Timor Leste tenke hatene kauza saida mak EDTL atu hamate ahi iha territóriu tomak.
“Ami atu hatene tanba preokupasaun públiku ne’ebé fó sai iha média katak ahi atu mate territóriu tomak”, dehan nia, iha plenária Uma Fukun PN, horisehik.
Tuir nia, karik orsamentu ne’ebé Governu propoin tokon $140 mak la sufisiente hodi rezolve ezijénsia ne’e karik oinsá? Tanba Prezidente Repúblika promulga ona lei ne’e atu dada osan fundu petrolíferu tokon $140 ba kofre Estadu.
Antes ne’e, Diretór Nasionál Produsaun EDTL, Inácio de Jesus Leite hatete, kompañia fornesidor kombustivel ba Eletrisidade Timor-Leste (EDTL) ameasa atu la fornese tanba mina. Ne’e duni, posibilidade sentru elétriku Hera no Betanu sei la funsiona.
Rezerva kombustivel ne’ebé EDTL iha to’o de’it 20 Agostu 2018. Tanba ne’e, iha loron tuir mai ba oin posibilidade eletrisidade iha territóriu Timor laran tomak sei mate to’o hetan fali fornesimentu kombustivel.
Sentru elétrika boot rua hanesan iha Betanu hetan fornesimentu kombustivel husi kompañia Sacom no Hera hetan husi Esperansa Timor oan (ETO).
Nia esplika, sentru elétrika Betanu, hahú 25 Jullu 2018, jeradór ualu (8) mak hamate tanba kompañia la fornese ona mina.
Fornesimentu kombustivel ba EDTL intupidu tanba Governu seidauk selu tusan ba kompañia. Sacom iha dívida tokon $6 no ETO tokon $33.
