Tuir informasaun ne’ebé PR Lu Olo hetan, atu bele dada kadoras mai Timor Leste presiza orsamentu ne’ebé boot kuaze billaun $12 ka billaun $20. Enkuantu TL nia osan husi fundu minarai daudauk ne’e hela de’it billaun $15.
Xefe Estadu ne’e dehan, foin lalais governu hasai ona osan husi fundu minarai hamutuk millaun $650 hodi sosa asaun ConocoPhillips no Shell Energy.
“Agora atu hasai tan osan hira hodi dada kadoras mai?. Bazeia ba informasaun ne’ebé ha’u rona, atu dada kadoras mai iha Timor, presiza osan hamutuk $12 bilioens ou $20 bilioens, husi estimisaun ida ne’e defisil tebes, Timor atu foti osan husi ne’ebé?,” deklara PR Lu Olo hodi hatan ba preokupasaun husi komunidade sira liu husi dialogu iha Kampu Administrasaun Beloi, Vikeke Villa, Sesta (26/04).
PR Lu Olo dehan, kada tinan governu sempre foti osan husi fundu minarai hodi sustenta makina estadu, no se foti tan osan ba dada kadoras mai, osan sei hotu, no ikus mai labele ona atu koresponde ba infra-estrutura baziku ne’ebé komunidade sira presiza.
Tan ne’e, nia husu ba governu atu halo estudu viabilidade ne’ebé rigorozu liu, espesifiku ba finanseiru (orsamentu) bainhira hasai osan hodi dada kadoras mai Timor Leste, tanba problema rai laran interligadu ho infra-estrutura baziku sei sai preokupasaun.
“Dada kadoras mai iha Timor Leste ida ne’e mos importante, no ida ohin ita-boot sira (komunidade-red) ko’alia kona-ba nesesidade loron-loron ne’e mos importante, maibe ida ne’e la rezolve, hein de’it kadoras mai mak hodi rezolve dala ida de’it, tanba ne’e presiza ita tenke hanoin halo didi’ak ba buat sira ne’e hotu.”
“Laiha ema ida mak kontra dada kadoras mai Timor. Prezidente la kontra ida ne’e. Agora oinsa mak dada mai?, ida ne’e mak ita presiza haree,” PR Lu Olo hatete.
Xefe Estadu ne’e hatutan, se la uza orsamentu husi fundu minarai hodi dada kadoras mai TL konserteza sei uza osan imprestimu.
Maibé, Lu Olo dehan, kestaun mak impresta osan iha ne’ebé? Selu oinsa?, no rezultadu husi esplorasaun mina ne’e osan hira mak uza ba selu tusan, hira mak rai, no hira mak uza ba nesesidade rai laran?.
“Ita atu ba deve iha ne’ebé no osan ne’e hira mak ita atu selu deve. Osan minarai nian atu selu ba ema nian tusan ne’e hira?. Presiza ita hatene buat sira ne’e hotu, ne’e importante tebes,” katak nia.
Tan ne’e, Xefe Estadu ne’e apelu ba governu atu tetu didi’ak vantajen no desvantajen nune’e labele halo terus povu. Tanba se la jere didi’ak iha futuru mai sei akontese istori-malu.
