Xefe Estadu dehan durante tinan nee Timor0Leste no mundu hasoru dezafiu oioin no durante ema hotu nia moris.
“Hanesan sarani no mós hanesan Xefe Estadu hau hakarak deseja hau nia natál ba povu Timor Leste tomak, em partikular ba ita nia titulár órgaun soberania sira hotu, ba ita nia eis órgaun soberania sira hotu no ba ita hotu iha nee ami nia votu natál ba hotu-hotu espera sei hakat liu dala ida tan ba tinan 2022 ho haksolok,” dehan PR Lú Olo, iha Igreja Katedral Dili, Sesta (24/12).
Xefe Estadu sente kontente tanba hetan votu Natál direita husi Arsebispu Metropolitana Dili, Dom Virgílio do Carmo da Silva, neebé hatoo mós mensajen husi amu Papa Francisco.
“Ita hotu hakat liu dezafiu oioin iha ita hotu nia moris durante tempu nee, ohin hau mai ho hau nia familia partisipa missa ida nee hamutuk ho sarani sira atu halo reflesaun ba loron nain Jesus moris, simu ho hakolok mensajen husi ita-nia Bispu Dili Dom Virgílio do Carmo da Silva no simu ho haksolok mensajen husi Papa Francisco neebé hatoo ba sarani sira hotu iha mundu,” hatete nia.
Entretantu, Xefe Estadu Francisco Guterres Lú Olo akompaña husi espoza Cidalia Lopes Nobre Mouzinho Guterres no familia partisipa Misa Natál hamutuk ho sarani sira neebé prezide husi Arsebispu Metropolitana Dili Dom Virgílio do Carmo da Silva, iha Igreja Katedral, Dili.
Natál sei Loli Paz ba Timor
Entretantu, Primeiru Ministru (PM), Taur Matan Ruak informa, selebrasaun Natál iha tinan 2021 no simu tinan foun sei lori domin no paz ba iha timoroan hotu.
"Natál Kmanek no Ksolok Tinan Foun 2022 nian nakonu ho alegria, isin diak, paz no armonia iha ita-nia familia, ita-nia komunidade no ita nia país,” dehan PM Taur.
Xefe governu dehan, ho tinan foun nee sei bele lori forsa atu hakat liu dezafiu sira liuliu kona-ba pandemia Covid-19 no dezastre naturais neebé Timor Leste hasoru iha tinan 2021.
“Votu tinan foun 2022 nian koroadu ho forsa no enerjia foun, iha kbiit atu liu dezafiu sira no aproveita oportunidade sira hotu, ho rezilensia foun no reforsadu ho espiritu luta nian ba dezenvolvimentu no modernidade nian no hakuak boot povu Timor-Leste tomak,” tenik nia.
Espera 2022 Espiritu no Dispozisaun Foun
Iha fatin ketak, Ministru Asuntu Parlamentares no Komunikasaun Sosial (MAPKomS), Francisco Martins da Costa Pereira Jeronimo hatete, hasoru dezafiu boot rua iha tinan 2021, espera tinan foun 2022 sei mai ho espiritu no dispozizaun foun.
“Iha tinan 2021 nee, tinan neebé ita hotu hasoru dezafiu boot rua afeta ba iha saúde públiku no mós afeta ba estragu neebé infraestrutura hotu kuaze aat,” dehan nia.
Iha situasaun sira hanesan nee mosu tanba pandemia Covid-19 no situasaun kalamidade públiku neebé akontese iha loron 4 Abril 2021.
“MAPKomS hakarak hatoo votu Natál nian dame no ksolok ba timoroan hotu uma-kain ida-idak iha iha rai-laran no timoroan hotu namkari iha rai-liur,” dehan nia.
Hein katak mensajen dame no esperansa Natál nian leno ema hotu atu tama tinan foun 2022 ho espiritu no dispozisaun foun. Dame no ksolok ba ema hotu no moris nakonu ho prosperiedade