Tuir MAPKOMS, Francisco Martins Jeronimo katak, dialogu ne’ebe ohin halo ho Mídia na’in sira iha fatin ida ne’e, atu partilla informasaun ba malu, liu-liu iha parte Ministeriu nian ne’ebé halo no mós husu informasaun husi Mídia na’in, hafoin buka solusaun oinsa mak haree fila ba iha tinan oin mai, nune’e saida mak presiza atu hadia bele hadia no ida ne’ebé diak ona bele kontinua.
“Primeiru lugar ha’u hakarak hatete deit katak, divulgasaun informasaun husi mídia oras ne’e komesa diak I hanoin buat ne’ebé dala ruma iha falla balun, ami fó hatene malu no ha’u sempre iha komunikasaun diak ho media na’in sira hotu,” dehan nia ba jornalista sira, iha ambitu sorumutu entre Governu ho Na’in ba Mídia sira ho tema “Rekuperasaun Servisu ba Publikasaun Informasaun”, iha Sentru Nasional Empregu no Formasaun Profesional (CNEFP) Tibar, kuarta ne’e (29/12).
Ho nune’e, Governante ne’e fó hanoin ba Mídia na’in sira katak, bainhira iha difikuldade ruma tenke servisu hamutuk nafatin atu nune’e bele fó solusaun ba sira, hodi labele hamate sira nia mídia, maibé kontinua no Governu sei tetu no buka solusaun oinsa mak dalan diak liu atu Mídia sira bele sustentavel.
Iha fatin hanesan, Na’in ba Mídia Lafaek News, Acaçio Pinto, hatete, hanesan Mídia na’in husi Lafaek News haree ba Governu nia programa ida ne’e diak tebes, tanba sira hatene katak sira nia parseiru hotu iha ne’e, ba Mídia sira ne’ebé eziste ona iha Timor-Leste tanto imprime no online no mós mídia buletim sira seluk ne’ebé eziste ona.
Nune’e, programa ida ne’e importante tanba mídia na’in sira bele rona direita opiniaun politika governu liu-liu MAPKomS no SEKOMS nian, oinsa iha ligasaun ba malu.
“Ohin ita rona aprezentasaun kona ba servisu ne’ebé MAPKomS no SEKOMS halo no dala barak servisu hamutuk ho radio komunidade sira oinsa mak bele liga ho radio komunidade mai nasional no husi nasional liga ho radio komunidade ho informasaun sira ne’ebé bele to’o iha baze, ida ne’e parte apoiu ida ne’ebé diak ba mídia sira,” dehan nia.
Nia hatutan, agora oinsa ba oin Governu iha politika bele halo balansu no kategoria definisaun entre mídia sira tanto, mídia publiku, impreme, online no privadu sira. Tanba ne’e liu husi dialogo ida ne’e, Governo bele halo konsiderasaun iha tinan oin.
