Prezidente Republika Jose Ramos Horta hatete, Nuudar Komandante Supremu Forsa Armada nian, subliña ona importánsia atu halo tranzisaun husi kultura rezisténsia ba kultura profisionalizmu, dixiplina no servisu públiku.
Tan nee, Falintil-Forsa Defeza Timor-Leste (F-FDTL) no Polísia Nasionál Timor-Leste (PNTL) tenke kontinua afirma sira-nia an nuudar instituisaun republikana moderna, la partidária no subordinadu tomak ba Konstituisaun no ba autoridade sivíl sira neebé eleitu demokrátikamente.
“Dame, estabilidade no toleránsia neebé karakteriza Timor-Leste ohin loron mós rezulta hosi profisionalizmu neebé buras hosi ita-nia forsa defeza no seguransa, hosi reforsu kooperasaun entre instituisaun sira no konfiansa neebé harii ho komunidade sira,” dehan PR liu husi nia dskursu iha ambitu komemorasaun aniversariu restaurasaun indepedensia ba dala 24 neebé halao iha Tasi-Tolu, Kuarta (20/05).
Xefe estadu hatutan, Harii Estadu TL ho prosesu ida neebé naruk tebes, lahó sobu ai-hun sira nia okos, ezije lideransa vizionária ne'ebé kualifikadu tebes, iha esperiénsia, prudente no mós brani iha mehi no planeamentu, foti risku no aposta iha inovasaun sira.
“Ohin, falta tinan ida atu ha’u-nia mandatu prezidensiál remata, ha’u koalia ba ita-boot sira ho serenidade, ho konsiénsia neebé moos, atu fó hau-nia diak liu ba Pátria hosi povu laranluak ida-nee,” PR afirma.
