Novidade ne’e hato’o bainhira Primeiru-Ministru (PM), Kay Rala Xanana Gusmão hala’o ekontru ho Prezidente Repúblika (PR), José Ramos-Horta hodi relata kona-ba servisu governu hodi hili Sergio Hornai.
“Ha’u mai informa ba prezidente katak, kuarta-feira sinzas ne’e pontu toleransia ba funsionáriu sira, aban ami iha Konsellu-Ministru, kinta-feira mós Prezidente Ramos-Horta sei fó posse ba Ministru Justisa foun, Dr. Sergio Hornai,” informa PM Xanana hafoin hala’o enkontru iha Palasiu Prezidensiál, Segunda (12/02).
PM Xanana dehan, governu aprezenta lista naran Sergio Honay ba PR Horta, tanba nia iha espriensia kona-ba setór justisa nia servisu hodi subtitui Saudozu Ministru-Justisa, Amandio de Sá Benevides.
“Sergio Hornai, nia iha ona esprensia iha setór justisa nian, tanba ne’e maka nia ba atu hadia sistema jstisa ne’ebé sei fragil,” dehan PM Xanana.
Iha enkontru ne’e, PM Xanana ho PR Horta deskute mós preparasaun governu nian hodi hadia estrada iha área Tasi Tolu no hadia fatin serimónia atu simu Papa Fransisco iha Aeroportu, no fatin sira seluk hanesan, Centru Kovensaun Dili, Tasi-Tolu no Igreja Katederál.
Governu sei kontinua hamutuk ho Delegasaun Organizadora Vaticano (DOV) no Igreja Katólika atu haree kondisaun fatin papa tun hosi aiviaun no kareta ne’ebé sei prepara ba Papa Fransisco.
“Ami deskute mós governu mós komesa halo ona preparasaun ba fatin atu simu vizita ofisiál Papa Fransisco nian tun hosi aviaun no kareta ki’ik ne’ebé Papa sei uza inklui hadia estrada no sei hadia fatin ne’ebé identifika ona,” dehan PM.
Xefe Governu hatutan, Ministériu Obras Publika (MOP) komesa hadia estrada balun iha Kristu Rei no munisipiu balun tan.
Xefe Governu informa mós ba PR Horta kona-ba prosesu autória ne’ebé governu komesa hala’o ona hahú hosi Munisipiu Lautem to’o RAEAO. No Governu kontinua hadia sistema Jestaun Finasas Estadu Timor-Leste nian atu la’o kumpre regras lei orsamentu nian.
