PR Horta dehan, purtantu programa nakonu, depois iha Darwin ohin dader simu doutoramentu Honoris Causa, la'ós  primeiravez mak nia simu.

"Iha Austrália universidade haat ka lima ona, iha Melbourne, iha Sidney. Iha mundu ha'u simu ona doutoramentu Honoris Causa 20 resin. Austrália nian, Korea du Súl, Japaun, Eropa, Estadus Unidus Amérika, Brazil, purtantu serimónia ida simples ema barak iha ne'eba," dehan nia, iha Aeroportu Internasionál Nicolau Lobato Komoro, horisehik.

Nia hatete, estudante timoroan iha ne'eba, sei aumenta tan, hasoru malu ohin dader ho sira nia Primeiru Ministru iha Darwin.

Entretantu, PR Horta, simu onra akadémika prestijiozu liu Doutor Honoris Causa husi Universidade Charles Darwin.

Hanesan, onra ne’e konfere ba Prezidente Ramos-Horta husi Honorável Trevor Riley AO KC Chanceler, durante serimónia graduasaun ne’ebé hala’o ba graduadu liu 2220 iha loron 14 fulan. Maiu tinan 2026 iha kampus Casuarina universidade nian iha Darwin.

Doutor Honoris Causa mak onra akadémika aas liu ne’ebé universidade sira fó iha mundu tomak, rekoñese pesoál sira ho méritu esepsionál no realizasaun durante moris tomak iha área sira hanesan pás, kultura, siénsia, no polítika.

Onra ne’e reprezenta rekoñesimentu internasionál profunda ba Prezidente Repúblika nia kontribuisaun estraordináriu no sustentavel ba estabilidade rejionál no globál.