Ministériu Asuntu Kombatente Libertasaun Nasionál, Gil da Costa Monteiro “Oan Soru” hatete, MAKLN konvoka reuniaun ho KKLN oinsá bele kontínua buka solusaun hamutuk bá dadus veteranu husi primeiru rejístu iha tinan 2005 no segundu-rejístu 2009 nian hamutuk rihun 61 ne’ebé falta 59% atu konklui.
"Komisáriu sira ho responsáveis rezisténsia nian kompostu husi membru na’in 8, sei tun fila-fali bá munisipiu hotu-hotu, hodi halo desizaun bá dadus veteranu reklamadu no kontestadu rihun 61 liu ne’ebé mak oras ne’e pendente hela," dehan nia, liuhusi komunikadu ne’ebé diáriu ne’e asesu, horisehik.
Nia dehan, desizaun ida-ne’e foti liuhusi enkontru interministerial ida entre MAKLN ho Konsellu Kombatentes Libertasaun Nasionál hala’o iha Salão Três de Março Maubai, Komoro iha loron 12 fulan Maio tinan 2026.
"Enkuantu, desizaun sira ne’ebé atu hala’o dadauk iha inísiu fulan-juñu ne’e, sei dura durante fulan-ida (1 juñu to’o 1 jullu 2026). Desizaun hirak ne’e nu’udár prosesu kontinuasaun husi pursentu 41 (41%) ne’ebé mak antes hala’o tiha ona iha Setembru to’o Outubru 2025,"nia dehan.
Molok ne'e, MAKLN hatete, realsiona hola lista kontestasaun no rekomendasaun ne'ebé hamutuk rihun 61.711 iha fulan-Maiu deside anúnsia ba públiku.
"Iha 2026 ida-ne'e tenke fó solusaun,la hotu, maibé 50% husi kontestasaun no reklamasaun tenke fó,asuntu ida-ne’e tenke konklui iha tinan ida-ne’e, razaun tanba saida mak tenke konklui, ha’u Ministru, ha’u membru Governu administrativamente jere, inklui jere to’o osan," dehan Ministru Asunto Kombatentes Libertasaun Nasionál Gil da Costa ba Jornalista sira hafoin, enkontru entre estrutura MAKLN iha Salau, MaKLN, Kuarta(18/03).
Nia dehan osan estadu nian ne'ebé kualker ema dehan estudu nian fó de'it, ida ne'e mak tenke tau iha kabaas.
"Labele hanoin dehan osan estadu nian ne’ebé kualker ita ida mai dehan, estadu nian ne’e fó de’it. Bé ó sé? Ó estadu ka lae. Ne’e mak ita tenke tau iha ita-nia kabas,"nia dehan.
Nia informa dadus reklamadu no kontestadu ne’ebé rejístadu iha sistema baze dadus hamutuk 61.711, ne’ebé mak kompostu husi kontestasaun hamutuk 30.000 resin no restu ne’e maiória reklamasaun.
Dadus hirak-ne’e mai husi kombatente rejistadu dahuluk 2003 to’o 2005 inklui kombatente rejistudu daruak 2009, tuir rezultadu husi desizaun ne’e, seidauk finaliza, tanba nia progresu foin mak atinje pursentu haat-nulu resin (40%-resin), tanba ne'e maka, liuhusi reuniaun institusionál ohin, desizaun fórum deside ona katak, iha fulan-Maiu mak foin halo fila-fali desizaun finál.
