Tuir observasaun husi Online INDEPENDENTE, iha terenu nota katak, bainhira Xefe Estadu atu dezloka ba Kamboja, hetan akompaña husi Primeiru Ministru Taur Matan Ruak, ho nia Vise Armanda Berta dos Santos, inklui membru Governu balun, iha Aeroportu Internasional Nikolau Lobatu, Komoro Dili.
Aleinde, akompaña mós husi parada militar husi FALINTIL-Forsa Defeza Timor-Leste (F-FDTL), protokolu no PNTL.
Enkuantu, Prezidente Repúblika sai husi Aeroportu ba nasaun Kamboja iha tuku 08:45 ho aviaun Air Asia husi Indonezía.
Enkuantu, tuir ajenda, Prezidente Repúblika, José Ramos Horta sei hala’o Vizita Estadu, husi loron 19 to’o 21 fulan-Outubru tinan ne’e.
Kamboja no Timor-Leste iha relasaun ne’ebé diak tebes. Nuudar atual Prezidente ASEAN nian, Kamboja dadaun ne’e sai mós defensor forte tebes kona ba Adezaun Timor-Leste, atu adere tama ba membru ASEAN.
“Vizita ne’ebé atu hala’o dadaun ne’e, sei sai nuudar oportunidade diak hodi reforsa no hametin liu tan parseria no amizade entre nasaun rua ne’e, no explora formas atu aumenta tan koperasaun iha matéria ba dezenvolve ekonomia, seguransa ai-han, konetividade aviasaun, troka kona bá komersiu nian, partilla experiénsia iha setor minarai no mós kona ba inisitativa regional sira entre matéria sira seluk tan,” komunikadu ne’ebé Online INDEPENDENTE asesu, tersa ne’e (18/10).
Durante Vizita Estadu ida ne’e mós Prezidente Repúblika, José Ramos Horta sei hala’o reuniaun ho Sua Majestade Liurai, Primeiru Ministru Hun Sen, no kortezia ba Prezidente Senado husi Prezidente Assembleia Nasional Reinu Kamboja nian.
Nune’e, Prezidente nia asuntu elevado mak sei koalia iha universidade tolu, tuir mai iha ne’ebá sei simu kondekorasaun iha "Doutoramento Honoris Causa iha Administração no Liderança Educativa" no ida fali iha "Professor Honorário Distinto de Relações Internacionais".
Iha Vizita Estadu ida ne’e mós sei akompaña husi Setor Privado TL nian no Komunidade Emprezariál, no mós sira ne’ebé partisipa iha Forum Emprezariál ida ne’ebé organiza husi Ministeriu Negosiu Kooperasaun no Estranjeiru, Embaixada TL iha Reinu Kamboja, ne’ebé servisu hamutuk ho Câmara Comércio Kamboja nian no Trade Invest Timor-Leste.
Entretantu, vizita ne’e nuudar konvidadu husi Na’in Liurai Sua Majestade Preah Bat Samdech Preah Boromneath NORODOM SIHAMONI.
Ho nune’e, iha Vizita Estadu ba Reinu Kamboja ne’e, Prezidente Ramos Horta nuudar vizita daruak.
Ba vizita ba dahuluk, Xefe Estadu hala’o iha tinan 2011, iha nia mandatu Prezidente Repúblika periode 2007-2012.
Husi ne’ebá kedas mak realiza ona interkambiu vizitas alto nivel lubuk ida no beibeik entre nasaun rua ne’e, inklui mós vizita Ofisiál S.E. Kay Rala Xanana Gusmão, momentu ne’ebá bainhira kaer knaar Primeiru Ministru, iha tinan 2013.
Aleinde, iha tinan 2016, vizita Ofisiál S.E. Samdech Akka Moha Sena PadeiTecho Hun Sen, Primeiru Ministru Reinu Kamboja mai Timor. Hafoin iha tinan 2019, hatutan mós ho vizita traballu ba Kamboja, tantu husi Prezidente Ramos Horta, nune’e mós husi Prezidente no Eis Primeiru Ministru Kay Rala Xanana Gusmão.
Prezidente Repúblika hasoru malu ho Primeiru Ministru, Hun Sen iha okaziaun Assembleia ONU nian ba dala 77, fulan Setembru tinan 2022.
Prezidente Repúblika José Ramos Horta sei fila mai iha TL, iha loron 23 fulan-Outubru tinan ne’e.
