Iha alegasaun Ministériu Públiku imputa arguidu na'in rua ba krime lima maka hanesan, krime Abuzu Poder, Brankamentu Kapitais, Fraude Fiskal, Partisipasaun Ekonomia no Konflitu interese.

Iha alegasun ne’e, Ministériu Públiku husu ba Tribunál atu aplika medida koasaun prizasaun preventiva nune’e bele asegura arguidu sira.

Entertantu defeza husi arguidu na'in rua, Arlindo Sanches husu ba Tribunál Distrital Dili atu aplika pena adekuadu ba nia kliente sira.

Tuir defeza akuzasaun ne'ebé Ministeriu Públiku aprezenta ba Tribunal la loos no la adekuadu, maibé rajaun ne'e hotu hato'o depende ba Tribunal maka sei tetu.

Rona tiha deklarasaun husi parte Defeza no Ministeriu Publiku, Tribunál desidi adia prosesu julgamentu ne’e ba loron seluk hodi rona desiaun.

Enkuantu, iha primeiu interrogatóriu ne’e prezide husi Juíza Singular, Albertina Neves, Ministériu Públiku reprezenta husi Matias Soares, arguidu sira hetan assisténsia legál husi Defensor Públiku no Advogadu Privadu Arlindo Sanches, Adelina Lobo no Virna Carvalho.

Molok ne’e, Komisaun Anti Korrupsaun (KAK) liu husi ekipa medida prevensaun no kombate korrupsaun detein suspeitu na'in rua (2) ho inisial MFC no GPDS, tanba deskonfia envolve kazu projetu instalasaun Set-Top Box iha Radio Televizaun Timor-Leste Empreza Publiku (RTTL.EP).

Suspeitu GPSD nu’udar asesor iha Ministeriu Asuntu Parlamentár no Komunikasaun Sosiál (MAPKOMS), Dirasaun Planu, Programa no Forsa Traballu, nune’e mós suspeita MFC nu’udar na’in ba kompañia Dili Eternal Inovation Information ne’ebé hetan kontratu hanesan manan na’in ba projeitu intalasaun Set-Top Box.

Ekipa KAK ezekuta mandadu Tribunál hodi halo aprensaun no buska ba  suspeitu na’in rua iha oras no fatin ne’ebé la hanesan, tanba suspeitu GPDS ekipa KAK halo buska no aprensaun iha ninia servisu fatin MAPKOMS maizumenus tuku  9:30 Otl no suspeitu MFC ekipa KAK halo buska no aprensaun iha nia uma Tuana-Laran maizu menus tuku 10:15 Otl.

Iha prosesu ne’e, ekipa KAK halo aprensaun ba dokumentu balun no asesgura karreta privadu ida ne’ebé suspeita uza.

Pontu fokal KAK, Euclides Vidal Madeira hateten, KAK halo detensaun, apreensaun no buska domisliariu ba suspeitu na’in rua, tanba envolve iha kazu projetu Set-Top Box.

Prosesu ba kazu ne’e rasik  KAK inisia investigasaun iha tinan kotuk,  hafoin konklui investigasaun KAK  hato’o rejultadu ba Ministeriu Públiku (MP). Ne’e duni, iha fulan Setembru foin lalais KAK simu mandadu husi Tribunál baseia ba pedidu Ministeriu Públiku nian kontinua haklean prosesu investigasaun ba kazu ne’e.

“ KAK inisia prosesu investigasaun ba kazu ne’e, tanba projetu instalasaun Set-Top Box fó prejuizu ba estadu ho montante orsamentu $ 7, 680.00. Ohin ita kumpri mandadu detensaun, apreensaun no buska domisiliariu ba suspeitu na’in tolu ne’ebé envolve iha kazu ne’e, maibé ita detein de’it suspeitu na’in rua, tanba supeitu na’in ida iha hela rai liur,” dehan Euclides Vidal Madeira iha ninia servisu fatin, (12/10).

Nia haktuir,  suspeitu hirak ne’e ekipa  lori kedas  mai sala detensaun KAK nian hodi kumpri oras 72, hafoin maka submete ba interogatoriu dahuluk iha loron 14 Setembru 2022.

“Aliende ne’e ekipa mós foti evidensia balun, nune’e bele ajuda prosesu investigasaun ne’ebé KAK sei  halo tuir mai,”  tenik nia.