Iha 12 Outubru 2022, Konsellu Ministru hafoin aprova alterasaun ba dekretu lei númeru 37/2022 kona-ba subsidiu tinan nia rohan ba kada uma-kain, haruka lei refere ba Prezidente Repúblika (PR), José Ramos Horta, hodi foti desizaun.
Liu ona loron 15 maibé PR Horta seidauk foti desizaun ba Lei Subsidiu $200 ne’e.
Iha 27 Outubru, horseik, hafoin hasoru-malu ho PR Horta, Primeiru Ministru, Taur Matan Ruak husu ba populasaun sira atu hein tanba PR Horta seidauk promulga lei refere.
"Subsidiu anual uma kain ida ne'e seidauk promulga, tékniku sira haree hela, parese promulga ita-boot (jornalista) sira hatene," dehan PM Taur iha Palasiu Prezidensiál Bairu-Pite, horseik.
Molok ne'e, PR Horta hatete, nia simu ona dekretu lei númeru 37/2022 kona-ba subsídiu tinan nia rohan ba uma-kain, maibé sei tetu atu husu alterasaun ba lei refere molok foti desizaun.
"Lei subsidiu uma-kain iha ona ha'u-nia meza leten, ha'u gosta liu lei ida anteriór tanba lei anteriór ne'ebé governu halo ne'e mak di'ak loos, tanba subsidiu ne'e fó de'it ba uma-kain sira ne'ebé kiak liu ka vulneravel loos, lalika fó ba hotu-hotu, ida ne'e mak loos," dehan nia.
Tan ne’e, nia husu atu lei foun ne'e di'ak liu halo tuir de'it lei antigun.
"Ha'u seidauk iha desizaun ba lei ida ne'e, atu veta ka promulga,"dehan nia.
