Kestaun ne'e, Prezidente Republika hato'o iha ámbitu selebra loron internasionál labarik feto ne’ebé monu iha loron 11 fulan Outubru tinan ne'e, ne'ebe realiza husi Plan Internasional, iha Palasiu Prezidente.
‘’Inisiativa husi PLAN Internasionál, UNICEF ho instituisaun governu no Prezidénsia Repúblika atu selebra loron mundiál ba labarik feto ne’ebé deklaradu husi Assembleia Jerál ONU, atu fó hanoin bá direitu kriansa no ba labarik feto’’ dehan Xefe Estadu, liu husi komunikadu ne'ebe Online INDEPENDENTE asesu, tersa horseik (11/10).
Tuir Xefe Estadu katak, deskriminasaun ba labarik feto kontinua akontese tinan barak ona no feto barak mak la hetan oportunidade.
“Timor-Leste hanesan iha mundu liuliu rai sira iha terseiru mundu, sei iha diskriminasaun, dala ruma la’ós tanba aman-inan hakarak duni diskriminasaun, maibé tanbá tinan atus bá atus alin feto sira, mak halo servisu oioin iha uma, iha família kiak, atu haruka oan mane de’it mak ba eskola, kuitadu, feto la iha oportunidade,’’ nia lamenta.
Prezidente Repúblika apresia ho mudansa ne’ebé akontese iha sosiedade, tanba feto komesa asesu ona ensinu superior maske númeru seidauk sufisiente.
Tan ne'e, Xefe Estadu mós apela ba ema hotu atu hapara violénsia kontra labarik feto no mane, inklui inan sira.
‘’Primeiru Igualdade jéneru, tenke hapara violénsia kontra labarik mane no labarik feto no inan, tanbá violénsia doméstika iha Timor ne’e, ita bele hateten jeneralizadu liuliu ba kontra feto,’’ nia sublina.
Entretantu, iha selebrasaun Loron Internasionál Labarik Feto, Osmenia Afonso Soares da Cruz tinan 15, husi Aldeia Kela’e, Suku Talitu, Postu Administrativu Laulara, Munisípiu Aileu, ne’ebé hanesan mós estudante 10 ano husi Eskola Sekundária Jerál Númeru 1 Laulara, okupa kna’ar hanesan Prezidente Repúblika durante oras ida.
“Sente ónradu tebes ho oportunidade ne’e. Ha’u hare kualidade edukasaun sai preokupasaun. Ita tenke presija atensaun liu tan ba infraestrutura eskola, biblioteka no seluk tan’’ expressa oan husi Agosto Afonso no Agusta Soares, hafoin okupa kna’ar Xefe Estadu durante oras ida.
Enkuantu, Diretóra Plan Internasionál Timor-Leste, Dylliana Ximenes agradese oportunidade ne’ebé oferese husi Prezidente Repúblika, hodi realiza inisiativa ida ne’e.
