Tuir Xefe Estadu, ninia omólogu Joko Widodo prefere atu Indonézia apoia ekonomia Timor-Leste hodi la’o ba oin, ho apoiu husi entidade oin-oin.
“Projetu rua ne’e, ita bele hateten, governu ba governu, business ba business, signifika, parte rua envolvidu, ida mak governu Indonézia no Timor-Leste, seluk mak setór privadu husi Indonézia no Timor-Leste, para projetu rua ne’e benefisia Timor-Leste, ita rasik mak tenke badinas, book an, mobiliza an, mobiliza setór privadu nasionál,”haktuir komunikadu ne’ebé Online INDEPENDENTE asesu, sesta ne’e (30/09).
Prezidente Repúblika mós defende nesesidade atu governu Indonézia apoia setór privadu no haruka nafatin ekipa empreza estatál Indonézia nian (Badan Usaha Milik Negara - BUMN) atu kontinua partisipa ativamente iha prosesu dezenvolvimentu Timor-Leste nian.
Xefe Estadu hateten katak, governu Indonézia delega Ministru Koordenadór, Luhut Panjaitan hodi lidera Kriasaun Zona Komérsiu Livre no Parke Industriál iha Rejiaun Autónoma Oekusse.
“Prezidente Joko Widodo interesadu no motivadu tebe-tebes, delegasaun ida husi Jakarta mai (iha Bali) sira hateten, Prezidente Joko Widodo foin daudaun bolu sira no ko’alia ho sira no iha semana ida nia laran, Prezidente Joko Widodo sei telefone ba ha’u no ohin kalan duni ko’alia telefone ho Ministru Koordenadór, Luhut Panjaitan, nia mak sei reprezenta Indonézia hodi koordena projetu ne’e,” subliña Xefe Estadu.
Prezidente Repúblika husu ba governu, liu-liu ministériu responsável ba projetu ne’e hodi diskuti ho detallu projetu ne’e ho Indonézia, tanba Prezidente Repúblika bele halo diplomasia ekonómika, maibé labele asina akordu ruma.
“Ita labele la’o neineik, ita atu tama daudaun ba ASEAN, se ita la la’o, la aselera ita-nia prosesu dezenvolvimentu ekonómiku, ita la konsege hanesan toman ASEAN nian, ne’e duni Prezidente Jokowi hakarak, book no book lailais, ajuda ita ho ita-nia ekonomia,” konklui Xefe Estadu.
Entretantu, durante vizita Prezidente Repúblika nian bá Indonézia, membru Governu sira ne’ebé hola parte iha delegasaun, asina akordu iha setór agrikultura, ekonomia no transporte.
Enkuantu, projetu seluk ne’ebé sei iha faze diskusaun mak apoiu kriasaun komité konjunta iha fronteira, apoia dezenvolvimentu ekonómiku iha fronteira, Kriasaun Zona Komérsiu Livre no Parke Industriál iha Rejiaun Autónoma Oekusse.
