Informasaun ne'ebé diariu ne'e asesu, rute viajen Prezidente Repúblika nian nee Dili-Denpasar. Iha Denpasar, sei simu husi Governadór Bali no sei halao enkontru bilaterál.
Xefe Estadu antes dezloka ba Indonézia, iha Aeroportu internasionál Nicolau Lobato Komoro, simu ho parada militár hafoin halo dezlokasaun.
Nune'e, ekipa delegasaun neebé akompaña Xefe Estadu ba Indonézia halao vizita Estadu nian nee mak Xefe Kaza Sivíl Prezidensia Repúblika, Bendito Freitas, asesora Dulce de Jesus Soares.
Membru governu kompostu husi Ministru Agrikultura no Peska (MAP), Pedro dos Reis, Ministru Transporte no Komunikasaun (MTK), José Agostinho, Ministru Turizmu Komérsiu no Indústria (MTKI), José Lucas do Carmo da Silva.
Entretantu, reprezentante bankada parlamentár hanesan deputada KHUNTO, Olinda Guterres, Deputadu Partidu Demokratiku, Mariano Assanami Sabino, Deputada Fretilin, Nelia Menezes, Deputadu CNRT, Patrocínio Fernandes.
Inklui mós iha delegasaun nee Prezidente Cámara Comersiu Industria Timor-Leste (CCI-TL), Oscar Lima ho média na'in lima husi GMN-TV, Timor Post, RTTL, Hatutan. Com, STL, no SM News.
Ajenda husi Palásiu Prezidensiál, durante vizita nee Xefe Estadu sei hasoru malu ho nia ómologu Prezidente Repúblika Indonézia, Joko Widodo, halo mós palestra iha universidade tolu, nune'e mós hasoru malu ho eis Prezidente Repúblika Indonézia, Susilo Bambang Yudhoyono.
Alende ne'e, entervista eskluzivu ho mídia husi Indonézia nian hanesan Metro-TV, Kompas-TV, enkontru ho Jenerál Chairman of Central Board of Nahdlatul Ulama, enkontru ho Coordinating Minister for Maritime and Investment Affairs, hasoru malu ho Sekretáriu Jenerál ASEAN.
Tanba ne'e, durante vizita Xefe Estadu sei koalia asuntu hametin liután kooperasaun bilaterál Timor-Leste ho Indonézia, asuntu ASEAN no ajenda sira seluk tan.
Depois, Xefe Estadu ho ekipa delegasaun sei fila hikas mai Timor-Leste iha loron (25/7) husi fronteira terrestre.
Observasaun iha terenu, Xefe Estadu mós hetan akompañamentu husi Primeiru Ministru, Taur Matan Ruak ho ministru, iha Aeroportu Internasionál Nicolao Lobato, Dili.