Ministru Fidelis dehan, karik Colin sente hakarak atu kontinua nia bele aprezenta tuir dalan justisa nian nune’e bele hetan justisa ne’ebé loloos.

Tanba, Ministru ne’e hatutan, nia parte mós seidauk hatene motivu sira husi asaun ne'ebé Colin halo durante tinan barak nia laran.

"Ita iha mós dalan justisa nian mak hanesan prokuradoria, iha polisia no mós iha tribunal sira, karik iha injustisa sira ne'ebé mak señor ne'e sente, sei kontinua karik, nia bele ba aprezenta tuir dalan justisa nian par bele hetan justisa ne'ebé loos," dehan Fidelis hafoin reuniaun Konsellu Ministru extraordinariu iha Palasiu Governu, Segunda (18/07).

Fidelis dehan, asuntu ne’e ema hotu preokua no sente triste tanba tinan barak ona nia kontinua demostra iha dalan-ninin sira.

Maibé, nia afirma, dalan ne'ebé di'ak atu bele hetan solusaun ne'e mak dalan justisa nian.

"Ne'ebé ita rekomenda liu husi dalan justisa nian par solusaun ba nia problema, ne'ebé ida ne'e mak ami bele dehan. Se ita husu ami atu iha opiniaun politika kona-ba asuntu ida ne'e ha'u hanoin ha'u labele pronunsia buat ruma, primeiru pontu, ha'u la hatene loloos kazu detaillu ne'e halo nusa, envolve see-see."

“Governu mós la'os parte justisa nian, karik iha injustisa ruma mak sidadaun ne'e ba iha tribunal, depois tribunal deside buka dalan par fó justisa ba sidadaun ne'e Governu obrigadu tenke halo.”

"Ne'ebé ho kazu ida ne'e ita-boot husu hanesan ne'e ita atu komenta ha'u hanoin defisil tebes ha'u atu komenta kona-ba asaun detaillu tanba ita la hatene loloos nia kazu detailladu ne'e," dehan nia.

Molok ne’e, Diretór Asosiasaun HAK, Sisto dos Santos hatete, Colin ema Australia ne'ebé sente lakon nia direitu realasióna ho osan ne'ebé nia investe iha City Café.

“Konforme fontes ne'ebé Asosiasaun HAK asesu, seidauk konfirmadu ho loloos, maibé purvolta $60 mill ne'ebé nia investe no nia lakon direitu ida ne'e, iha altura ne'eba sei iha tempu tranzisaun ONU nian. Iha informasaun sira ne'ebé Asosiasaun HAK rona, Colin lakon direitu ida ne'e mós tanba iha Timor-oan sira ne'ebé mós envolve hela iha prosesu ne'e,” dehan Sisto iha nia knar-fatin, Farol, Segunda (18/07).

Tuir nia, durante luta ba ukun an, Timor-Leste hetan mós apoiu husi Australianu lubuk ida tan ne’e, governu mós presiza loke matan ba sidadaun Australia ne’ebé ezije hela nia direitu.

"Tanba saida mak governu taka-matan, matan delek, nia neon taka no ibun labele loke ba ita-nia belun Colin ne'ebé lakon nia solidaridade, ita labele haree katak nia Australia lae no la loos, ita tenke haree katak ema ida mak lakon nia direitu ne'ebé tuir lei umanitáriu internasionál nia mós iha direitu atu rekere ba lia loos," hatete nia.

Sisto dehan, governu no estadu iha obrigasaun formál atu halo asaun ruma.

“Se estadu Timor-Leste laiha kbiit bele koordena ho Governu Austrália oinsa atu bele hatan ba nia preokupasaun, labele husik katuas ne'e to'o mate iha dalan,” dehan nia.

Iha fatin ketak, Diretór Ezekutivu Asia Justice And Rights (AJAR), José Luís Oliveira hatete, presiza husu uluk ba ofisial sira ne’ebé foti desizaun hasoru Colin.

“Imi hatene ofisial see-see mak deside duni sai sidadaun Colin ne'e husi City Cafe, tanba ne'e ba husu Lucia Lobato ne'ebé uluk nu'udar Ministra Justisa no Longuinhos Monteiro nu'udar Prokuradór razaun saida mak Governu duni nia sai husi City Cafe," dehan nia.

Entretantu, sidadaun Austrália ida, Colin Hiher, ho idade tinan 64, liu ona tinan 15 halo asaun pasifiku ida iha estrada públiku sira iha kapitál Dili hodi ezije nia direitu.