Prezidente Parlamentu Nasionál, Aniceto Longuinhos Guterres Lopes hateten, Prezidente Repúblika vizita Estadu ba Indonézia iha ajenda rasik.
"Parlamentu Nasionál la presiza hatene no la presiza interfere, maibé tanba nia ba nome Estadu, klaru vizita ne'e ita hakarak susesu ho ita nia rai viziñu, minimu atu hametin ita-nia relasaun entre Timor-Leste ho Indonézia," dehan nia, iha Parlamentu Nasionál, horisehik.
Prezidente PN hateten, laiha dalan seluk tenke iha relasaun di'ak ho viziñu sira, liuliu Indonézia ne'ebé dala-ruma Timor-Leste nia moris mós viziñu sira mak kaer.
"Entaun ita tenke hametin ita nia relasaun sira ne'e. Prezidente Repúblika hatene, tanba ne'e mak nia ba vizita ne'e," tenik Aniceto.
Bele mós ko'alia fronteira terrestre no marítima entre Timor-Leste ho Indonézia, nia hateten bele inklui kualkér asuntu.
"Tanba ne'e Prezidente Repúblika nia ajenda própriu Parlamentu Nasionál la presiza interfere klaru ke nia sai tenke koordenasaun órgaun governu ezekutivu no deputadu na'in lima (5) mós hola parte delegasaun ne'e," dehan nia.
Kona-ba restu mortais, nia dehan, kestaun ne'e governu nia kompeténsia, deputadu sira ko'alia, maibé sé mak atu realiza preokupa sira ne'e atu fó resposta ne'e governu.
"Ida-ne'e atu inklui hotu ka la inklui hotu ajenda Prezidente Repúblika nian, ne'e Prezidente Repúblika mak hatene. Deputadu sira aprezenta ona preokupasaun agora sé mak fó resposta mak governu hamutuk Prezidente Repúblika," nia hateten.
Nia fundamenta, entaun vizita hanesan ne'e aproveita hatama ka la hatama ajenda atu ko'alia ne'e, tanba Parlamentu Nasionál laiha buat ida atu interompe ajenda Prezidente Repúblika nian.
"Prezidente Repúblika ho Governu see iha asuntu ruma atu inklui liuliu kona-ba restus mortais ninian, ne'e imi informa palásiu Prezidente ne'ebá ajenda ne'e inklui ka la'e," Nia fundamenta.
Purtantu, Prezidente Repúblika José Ramos Horta ho nia delegasaun viajen ba Jakarta, Kupang no Laboan Bajo, iha Nusa Tenggara Timur (NTT), hahú 18 Jullu to'o 24 Jullu 2022.