Nia dehan, Jill Jolliffe ema ida ne'ebé dedikadu tebes, nia is kotu hatene kleur ona, iha fulan sira-nia laran hatene ona nia moras boot, Timor lakon ema di'ak ida ativista boot.

"Klaru, konforme kada instituisaun halo, governu, Parlamentu Nasionál, sosiédade sivil, jornalista sira hato votus pezar. Ha'u sempre fulan sira nia laran akompaña nia moras, mais nia momentu ne'e nia la ko'alia ona, bainhira ha'u ba vizita nia mós nia hanesan la koñese ona ha'u ne'e se loloos," dehan PR Horta, iha Hotel Novo Turizmu, Sábadu (3/12).

Nune'e, Xefe Estadu koñese di'ak loos Jill Jolliffe primeiravez nia mai iha Timor 1974, nia mai ho Grupu ida, nia uluk la'ós jornalista, nia uluk hola parte iha sindikatu traballadór sira mai ho delegasaun sindikatu.

Nia haktuir, iha tinan sira nia laran depois, nia servisu nu'udar jornalista reuters ho jornál oin-oin, depois nia ba Portugál hela iha Portugál tinan lubuk ida.

"Ha'u sempre akompaña nia servisu, sempre ko'alia ho nia, ha'u vizita nia iha Melbourne tinan ruma liu ba. Bainhira nia tama tiha ona ba fatin ferik katuas ne'ebé moras, ha'u ba vizita nia iha ne'eba," hatete nia.

Enkuantu, Jill Jolliffe mak halo gravasaun audio ba loron Proklamasaun Independénsia Unilaterál RDTL nian ne’ebé FRETILIN proklama iha 28 Novembru, halo gravasaun audio ba investidura Prezidente Repúblika iha 29 Novembru no mós posse ba Governu dahuluk RDTL nian iha 30 Novembru 1975. Gravasaun sira ne’e agora prezerva iha Arkivu Austrália no Iha Sentru Nasionál Chega (CNC) Balide.

Durante Okupasaun Indonézia, Jill Jolliffe kontinua mobiliza solidariedade internasionál ba Luta Timor nian, hola parte mós iha Ró Lusitânia Espresso ne’ebé atu mai Timor iha 1991 maibé Indonézia la autoriza.

Hafoin ukun aan, Jill Jolliffe kontinua halo servisu ho Eis Prizoneiru Politiku Timoroan sira hodi dokumentu prizoneiru sira nia Memoria iha programa Memoria Viva ne’ebé daudaun ne’e arkivu mós iha arkivu Sentru Chega nian.