PR Horta Apela ba Eleitór Sira Hili Kandidatu Xefe Suku Feto Featured

By Ekipa INDEPENDENTE Outubru 23, 2023 1298
Prezidente Repúblika José Ramos Horta. Foto:INDEPENDENTE. Prezidente Repúblika José Ramos Horta. Foto:INDEPENDENTE.

DILI: Iha eleisaun suku ne’ebé sei realiza iha loron 28 fulan-Outubru 2023, Prezidente Repúblika José Ramos Horta husu ba eleitór sira atu hili kandidatu feto ba xefe suku. Tanba xefe suku feto iha teritoriu laran tomak menus tebes.

“Ha’u nia mensajen e apoiu mak ba xefe suku feto, tanba feto iha aprezentasaun suku uituan liu iha Timor-Leste tomak. Ne’e duni ha’u apelu ba eleitór sira iha Metiaut no iha fatin hotu-hotu vota ba feto ba xefe suku,”dehan nia iha Palasiu Prezidensial, Aitaral Laran, Dili, (20/10). 

Tuir Xefe Estadu, iha xefe suku iha teritoriu Timor-Leste maioria mane, enkuantu ba feto menus liu.

Tanba ne’e, hili kandidatu feto nune’e xefe suku feto iha teritoriu laran bele atinji to’o 50%.

Iha eleisaun xefe suku, Prezidente Repúblika mós apela ba Polisia Nasional Timor-Leste (PNTL) atu halo intervensaun ba komunidade sira bainhira akontese problema ruma iha tempu votasaun.

Entretantu, molok ne’e Sekretária Estadu Igualdade, Elvina Sousa Carvalho hatete, feto iha teritoriu nasional hamutuk 241 mak kandidata an ba xefe suku hodi kompete iha eleisaun suku ne’ebé sei realiza iha loron 28 Outubru tinan ne’e.

Rate this item
(4 votes)

Independente Digital TV