“Parabens ba povu Timor-Leste, parabens ba Igreja Timor-Leste, parabens ba Amu Virgilio no obrigadu ba Santo Padre, ne'ebé nomeia ita-nia Arsebispu Metropolitano Dili ba estatu Kardeal," dehan PR Horta iha Kámara Eklesiastika Lecidere, Segunda (30/5).
Tanba ne'e, Xefe Estadu fiar katak nomeasaun Kardeal ne'e hanesan prevelijiu ida. Pronunsiamentu ne'e la'ós de'it lori prevelijiu ba Arsebispu Metropolitano Dili nu'udar pesoal, maibé mós ondra boot ida ba igreja Katólika iha Timor-Leste.
Nia hatete, ida ne'e nu'udar etapa istóriku ida ba Timor Leste ne'ebé dominante ho 98% Katólika fiar nu'udar kristaun Katólika iha Timor Leste hahú husi siklu XVI, bainhira primeiru misionáriu dominikanus sira to'o iha Lifau Oecusse.
Hahú husi ne'e, papél Igreja Katólika Timor Leste sai ona hanesan identidade nasionál ne'ebé junta hamutuk ho lian tetun no lian portuguesa, hodi halo Timor Leste nu'udar nasaun ida ne'ebé difirente tebes.
Entretantu, Arsebispu Metropolitano Dom Virgilio do Carmo hatete Uluk nanain hodi ninia naran no Igreja Timor nia naran hakarak hato'o agradese tebe-tebes ba iha Prezidente Repúblika José Ramos Horta ne'ebé ohin lokraik kmanek ida ne'e hakat mak iha Kámara Eklesiastika Lecidere iha ninia servisu fatin atu hato'o ninia felisitasaun ba atan nia ne'ebé Amu Papa fihir no nomea nu'udar kardial ba iha Santa Kreda iha Timor.
"Ha'u agradese tebes ba Xefe Estadu ne'ebé halo pasu ida mai iha ne'e atu hato'o felisitasaun ida ne'e. Ha'u nia sentimentu, ha'u la mehi no la buka ida ne'e, maibé bainhira ha'u rona ida ne'e ha'u hakfodak neeb hodi kalan ha'u susar loos atu toba, tanba ha'u la hatene buat ne'e mosu husi ne'ebé mai," haktuir Bispiu Dom Virgilio.
Maibé kompara Jesus bainhira iha Jardim nia reza molok atu hahú ninia kalvariu, depois ikus mai konkluzaun ida katak Amu Papa la fó ida ne'e ba Amu Dom Virgilio, maibé nia fó ida ne'e ba Igreja no sarani Timor.
Tanba sarani no Igreja Timor mak merese atu simu don ka grasa ida ne'e nu'udar rekoñesimetu ida ne'ebé Maromak halo liu husi Ami Papa ba povu Timor ne'ebé halo tiha ona ninia tinan atus lima nu'udar envajelizasaun nu'udar Igreja buras atu lima.
Tinan ida ne'e iha ne'ebé Timor Leste selebra nia restaurasaun independénsia ho Prezidente Repúblika ida ne'e hanesan mós grasa ida ne'ebé Nai Maromak fó ba Timor ne'ebé sentimentu agradesimentu, sem dúvida sente la soi ba ida ne'e, Maromak uza nu'udar instrumentu hovMaromak ninian ba ita nia povu.
Nia esplika, seremónia tuir publikasaun ne'ebé Bispu Dom Virgilio simu to'o ohin dader katak 27 Agostu mak Roma sei hala'o seremónia iha ne'eba, ne'ebé Amu Bispu Dom Virgilio sei simu hanesan posse kardinal nian iha ne'eba.
"Prosesu ne'e ha'u mós la hatene, maibé polítika uma kreda nia lala'ok hanesan ne'e maibé Amu Papa tinan-tinan nia tenke fihir nafatin kolaboradór hodi ajuda nia tau matan ba uma kreda," tenik nia.
Molok ne'e iha loron Domingu Asensaun loron 29 fulan Maiu tinan 2022 liu husi orasaun Maria do Regina Coeli, Amo Papa Francisco anunsiu konvokatoria ida iha loron 27 fulan Agostu ba kriasaun Kardeal foun. Ida ne'e nu'udar orgulhu ida ba sarani sira iha Timor Leste, tanba Arsebispu Metropolitano Dili nu'udar mós kandidatu ida husi Kardeal na'in 21 ne'ebé anunsia husi Amu Papa Francisco.
