"Agora daudaun iha hela meza komisaun no semana oin ita envia ba iha meza Parlamentu Nasional hodi bele tau ajenda diskusaun no aprova iha final global," dehan Prezidente Komisaun F, Noe da Silva Ximenes, iha Parlamentu Nasional, horisehik.
Nia esklarese, komisaun adianta oituan tanba UNICEF rasik mak hato'o sira-nia relatoriu pareser kleur.
"Horisehik mak sira foin hatama, entaun semana mai foin ita halo aprovasaun pareser finál hodi envia kedas ba meza Parlamentu Nasional," nia hateten.
Projetu-Lei Protesaun ba Labarik no Foinsa'e iha Perigu ne'e prefere liu ba oan no joven sira ne'ebe iha situasaun risku.
"Ita ko'alia espesifiku ba labarik ne'ebe iha situasaun risku de'it," dehan Noe.
Tuir nia, Projetu Lei Protesaun ba Labarik no Foinsa'e bele minimiza labarik fa'an sasán iha fatin públiku, maibe depende mós ba teknikamente no operasionaliza implementasaun.
"Ministériu totela sira mak sei organiza no oinsá mak bele garante lei nia sustentabilidade ne'e kuandu implementa," tenik nia.
Nia informa, hanesan lejizladór tenke garante buat ruma ba oan sira no joven. Prejetu lei ne’e total artigu 152, maibe inisiu ne'e iha artigu 103.
Purtantu, iha loron 20 setembru 2021 Parlamentu Nasionál (PN) aprova ona projetu-lei Protesaun ba labarik no Foinsa’e iha Perigu iha faze jeneralidade.
Projetu-lei númeru 29/V(3a) kona-ba Lei Protesaun Labarik no Foinsa’e iha Perigu, aprovadu ho rezultadu votasaun a-favór 54.
Preambulu husi projetu-lei ne’e previstu kona-bá dezenvolvimentu ida ba sistema protesaun integrál ba labarik sira, nune’e impoin esforsu armonizasaun lei hotu-hotu relasaun ho promosaun no protesaun diretu ba labarik no joven iha perigu sira.
Inisiativa lejizlativa ne’e bazea ba rezolusaun Parlamentu Nasionál númeru númeru 16/2003, 30 Jullu, ne’ebé Timor-Leste ratifika konvensaun kona-ba Direitu Labarik.
