PR Entrega Uma ba Idoza Modesta Iha Laklubar

Novembru 15, 2024

PR Entrega Uma ba Idoza Modesta Iha Laklubar ^Featured

By Ekipa INDEPENDENTE Agostu 01, 2023 1241

Prezidente Repúblika José Ramos-Horta, sesta foin lalais ne’e (28/07/23), entrega uma meia-parede, kioské ki’ik ida no fahi-luhan ba inan faluk idoza, Modesta Soares, iha Aldeia Torilalan, Suku Orlalan, Postu Administrativu Laklubar, Munisípiu Manatuto. Foto:Media Gabinete PR.

MANATUTU: Prezidente Repúblika José Ramos-Horta, sesta foin lalais ne’e (28/07/23), entrega uma meia-parede, kioské ki’ik ida no fahi-luhan ba inan faluk idoza, Modesta Soares, iha Aldeia Torilalan, Suku Orlalan, Postu Administrativu Laklubar, Munisípiu Manatuto.

“Uma ne'e harii husi Prezidénsia Repúblika liu husi Servisu Sosiedade Sivil no Apoiu Sosiál (SSAS-PR), hafoin Prezidente Horta haree uma ho medida metru 3x3, ne'ebé Modesta Soares hela ho nia beioan na’in rua no animal sira ne'ebé nia haki'ak,” Online INDEPENDENTE sita iha komunikadu.

Enkuantu, uma ne’ebé Prezidénsia Repúblika harii ne’e nia medida metru 7 x 6, fahe ba kuartu rua, sala vizita ida no ba kioské. Konstrusaun ba uma ne’e ho durasaun fulan rua.

Xefe Suku Orlalan, Carlos José Alves, agradese ba Prezidente Repúblika tanba ajuda nia komunidade vulneravel.

Nia mós husu atu Prezidente Repúblika kontinua nia atividade sosiál ba inan-ferik sira ne'ebé fraku no ba família barak ne'ebé presiza ajuda, liuliu hodi harii no oferese uma ba sira.

Rekorda katak, dezde iha fulan-Maiu 2022, Prezidénsia Repúblika hala’o ona atividade apoiu sosiál hamutuk 700-resin ba família benefisiária hamutuk 1000-resin iha territóriu-laran.

Rate this item

(0 votes)