Prezidente Repúblika hato’o mensajen ne’e iha ambitu  komemorasaun Loron Masakre 12 Novembru ba dala-30 no Loron Nasional Juventude ba dala-16, ne’ebé ho tema “Ho Espiritu As’wain 12 nian, juventude sai autór ba proteje Timor-Leste husi Covid-19”.

Tanba ne’e, Xefe Estadu konsidera, tema ba komemorasaun ne’e di’ak tebes nune’e,  fanu joven sira atu prekupa ho sira nia saúde.

“Ho laran ksolok tebes, ha’u simu informasaun husi Sekretáriu Estadu Juventude no Desportu katak sentru  juventude iha munisípiu sira, organiza-an ona atu haforsa Governu ninia kampaña hodi sensibiliza komunidade kona-bá importánsia simu vasina hasoru Covid-19,”dehan nia iha komemorasaun Loron Masakre 12 Novembru, iha Santa Kruz, Balide, sesta ne’e (12/11).

Nune’e, Xefe Estadu hatutan, joven sira hakarak apoia Governu iha kampaña vasinasaun tenki mai husi fiar ida katak ho vasina mak bele proteje an di’ak liu hasoru moras ne’e.

Juventude tenke banati tuir espíritu 12 Novembru nian husi ohin ba oin, liuliu iha situasaun kontribui luta ba kombate Covid-19 hodi hasa’e taxa partisipasaun vasina nian.

Entretantu, tuir dadus husi Komisaun Interministeriál ba Implementasaun Vasina Covid-19, hatudu katak, populasaun elejivel husi idade 18 ba leten, iha territóriu laran tomak ne’ebé simu ona vasina doze kompletu hamutuk 384,744 ka pursentu 51,0 (51,0%).

Aleinde, populasaun ho idade 12 to’o 17 ne’ebé simu ona vasina doze dahuluk iha Kapital Dili hamutuk 15.002 ka pursentu 25,9 (25,9%).

Asistente Editor: Saturnina da Costa