“Prezidente hanesan ha’u-nia Prezidente substitutu, kuandu tersa-feira ha’u tenki sai ba Korea do súl, Singapura, fila mai tenki aranka kedas ba Roma ba Amu Papa,” hatete Xefe Estadu, iha komunikadu ne’ebé Online INDEPENDENTE sita.

Prezidente Ramos-Horta avalia pozitivamente servisu ho Parlamentu Nasionál no konsidera katak, deputadu sira servisu produtivu tebes.

“Ha’u-nia mandatu servisu di’ak loos ho Prezidente kuaze semana-semana enkontru Parlamentu. Lejislatura ida-ne’e fó servisu todan ba Prezidente, leis, dekretu-leis lubuk ida iha 20 anos dezde independénsia, lejislatura ida-ne’e mak hanesan produtividade lejislativa barak teb-tebes no importante lejislasaun ne’ebé estruturante ba estadu,” katak Prezidente Repúblika.

Entretantu, Prezidente Parlamentu Nasionál, Aniceto Guterres hateten, eleisaun parlamentar tinan 2023 ne’e la’o di’ak tebes kompara ho eleisaun sira uluk.

“Ita hotu asiste eleisaun la’o di’ak kalma kompara ho eleisoens anteriores parese ida-ne’e di’ak liu, bi’ar balun dehan la di’ak, agora partidu balun lakon ka manán ne’e kestaun seluk, mais nia prosesu ne’e hanesan prosesu demokrátiku ida la’o di’ak, ne’e tanba lideransa estadu ida-ne’e hanesan Prezidente-da-Repúblika ne’ebé nu’udar Xefe-de-Estadu, nia kondús prosesu ne’e tomak em-nome de estadu la’o ho di’ak,” hateten Prezidente Aniceto.

Líder órgaun lejislatura ne’e mós felisita Prezidente Repúblika ne’ebé kompleta ona mandatu ba tinan ida iha 20 Maiu foin lalais ne’e.

Prezidente Aniceto hatutan, Timoroan hotu orgullu hanesan nasaun no estadu ne’ebé foun, maske demokrasia Timor nian sei nurak, maibé, demokrasia di’ak no maduru tebes.

“Ha’u hakarak aproveita mós oportunidade ida-ne’e, nu’udar Prezidente Parlamentu ha’u hakarak fesilita povu Timor-Leste tomak ne’ebé hatudu ninia maturidade iha prosesu demokrátiku iha ita-nia rain no halo ita-nia demokrasia sai tasak liután, demokrasia iha estadu foun tasak liután,” katak Prezidente Parlamentu Nasionál.