Iha faze primeiru tomada-de-pose totál estrutura Governu hamutuk 12. Iha faze segundu aumenta tan membru na’in 21. Ne’e duni, totál estrutura governu atuál hamutuk 33.

Proposta lista ba membru VII Governu Konstitusionál, antes ne’e Primeiru Ministru Mari Alkatiri, entrega ba Prezidente-da-Repúblika iha loron-28 fulan-Setembru no Prezidente-da-Repúblika dekreta tiha iha loron-29 fulan-Setembru ho dekretu Prezidente-da-Repúblika No 63/2017 hafoin halo tiha publikasaun mosu fallansu tékniku ho nune’e dekreta fali iha loron-2 fulan-Outubru.

Membru VII Governu Konstitusionál segunda faze, hala’o ona tomada-de-pose iha loron 3 Outubru iha Palásiu Prezidente Nicolau Lobato Bairru-Pité, Dili.

Nune’e, informasaun ne’ebé diáriu ne’e asesu posibilidade sei mosu tan pose ba faze datoluk ho membru na’in lima (5). Signifika, totál membru sei aumenta to’o 38.

Ne’e duni, postura Governu foun ne’e kontradís ho deklarasaun ne’ebé antes ne’e Primeiru Ministru, Mari Alkatiri, hasai iha momentu diskusaun forma koligasaun.

Iha loron 29 Agostu 2017, Alkatiri dehan, polítika ne’ebé governu foun halo sei la boot. Tanba ne’e, nia iha hanoin atu forma governu ne’ebé ki’ik maibé efisiente iha ninia servisu.

“Naturalmente kuandu partidu barabarak tendénsia governu atu boot. (Tanba ne’e) ha’u husu para kompriende. Husik Primeiru Ministru mak forma ninia governu”, dehan nia.

Nia dehan, estrutura Governu másimu na’in 30. Hakiik postura governu atu labele halo gastu boot ba orsamentu.

La’ós ne’e de’it, Adjuntu Sekretáriu Jerál FRETILIN, José Maria dos Reis, iha loron 22 Setembru 2017, bainhira hasoru malu ho Primeiru Ministru hateten, lista membru VII Governu Konstitusionál sei la boot hanesan ho VI Governu Konstitusionál.

Entretantu, Prezidente Bankada Partidu Libertasaun Populár (PLP), Fidelis Magalhães hatete, antes ne’e Bloku Koligasaun anunsia ona atu halo ki'ik estrutura governu, maibé la hatudu realidade.

“Uluk Sekretáriu Jerál FRETILIN, Mari Alkatiri, hatete ona ita hotu akompaña atu halo ki'ik estrutura governu, maibé realidade boot no ami rona sei sai boot liután” dehan nia.

Nia hatutan, haree ba postura governu ne'ebé boot ba beibeik parte husi opozisaun sei hein sira iha debate aprezentasaun programa.

Atu sira bele esplika kle'an liu tanba saida mak haboot estrutura governu no tanba saida mak ministériu balun fahe ba rua.

Nune’e, Deputadu Natalino da Costa hatete, alargasaun estrutura VII governu ne'ebé haree ba sei sai boot liu ne’e responsabilidade husi Primeiru Ministru tanba ne’e hotu-hotu sei submete.

Nia mós hatutan, alargasaun ne’e mezmu halo despeza Estadu sei makaas, maibé ne’e depende ba demanda governu nian ne'ebé presiza.

Iha fatin hanesan, Vise-Prezidente FRETILIN, Francisco Miranda Branco hatete, polítika FRETILIN nian antes ne’e hakarak atu hakiik estrutura governu, maibé tanba la manan maioria, polítika ne’e la konsege implementa.

Nia hatutan, estrutura governu ne'ebé sai boot ne’e kauza husi ukun hamutuk ne'ebé ema hotu hatene kona-ba Governasaun inkluzaun ne’e hakarak ka lakohi estrutura ne’e tenke boot.