FRETILIN-CNRT-PD-KHUNTO Hakarak Prado Foun Featured

By Jacinto Xavier Outubru 04, 2017 2535
Prado Prado

DILI: Bankada lima iha Parlamentu Nasionál liu husi Plenária hahú foti ona pozisaun ba akizasaun karreta Prado foun ba deputadu sira. Partidu haat mak konkorda hodi sosa Prado maka Bankada FRETILIN, CNRT, PD no KHUNTO. Entretantu, PLP rasik sei uza dalan diplomasia.

Antes ne’e, liu husi reuniaun Komisaun Adminitrativu Parlamentu Nasionál bankada Parlamentár hotu-hotu fó votu unanimidade ba akizasaun Prado foun no alienasaun Prado tuan.

Maski nune’e, iha diskusaun plenária Parlamentu Nasionál nian dinámika polítika hahú muda uitoan.

PLP ne’ebé iha Komisaun Administrativa apoiu sosa Prado foun no alienasaun ba Prado tuan, deklara fali katak, antes sosa karreta foun presiza halo inspesaun ba viatura tuan atu iha kondisaun karik bele kontinua utiliza ba halo servisu.

“Ami prontu utiliza karreta husi III Lejizlatura nian, hodi nune’e bele fasilita ami nia servisu”, dehan Vise-Prezidente Bankada PLP, Angelita Sarmento, iha plenária, horisehik.

Ne’e duni, husi Parlamentu Nasionál uza kompeténsia hodi rekolla fila-fali viatura ne'ebé deputadu III Lejizlatura sira utiliza hodi haree fali nia-kondisaun nune’e bele atribui ba deputadu IV Lejizlatura sira utiliza. Atu nune’e, labele halo fali akizasaun ba karreta foun hodi poupa osan povu nian.

Iha fatin hanesan, Deputadu Bankada FRETILIN, Aurélio Freitas hatete, Konsellu Administrasaun tetu ona desizaun hotu hodi halo akizasaun ba viatura foun no halo leilaun ba karreta ne'ebé deputadu III Lejizlatura uza ona.

Nia hatutan, halo akizasaun ne’e tuir lei parlamentu nian atu fó kondisaun ba deputadu sira atu hala’o nia knaar fiskalizasaun. Alende ne’e, tuir regra normál, viatura ne'ebé utiliza ona tinan lima no nia kilometrajen tama ona ba rihun 150 ne’e tenke halo leilaun tanba ba futuru bele fó impaktu ba kustu manutensaun.

Nune’e, deputadu Duarte Nunes husi Bankada CNRT hatete, Parlamentu Nasionál hakarak ka lakohi tenke hakru'uk ba lei, tanba prosesu akizasaun ne’e hakerek ona iha lei, tanba ne’e tenke submete.

Alende ne’e, Deputadu Bankada PD, Luis Solaso Oliveira hatete, Parlamentu Nasionál hanesan órgaun soberanu daruak iha nasaun ne’e tenke firmeza hodi halo desizaun, labele haree ba opiniaun públiku hodi halo desizaun la tuir prosedimentu administrasaun parlamentu nian.

Nune’e, Prezidente Bankada KHUNTO, Luis Norberto hatete, PN presiza Órgaun Soberania Estadu atu halo atendimentu ne'ebé hanesan, nune’e bele fasilita servisu.

“Ami sei la haree ba karreta foun ka tuan, maibé presiza tebes atendimentu ne'ebé hanesan ba deputadu foun ka tuan hotu”, tenik nia.

Rona ideia husi bankada hotu, Prezidente Parlamentu Nasionál, Aniceto Guterres halo inskrisaun ba hanoin deputadu sira nian sei lori fila-fali ba Konsellu Administrasaun Parlamentár atu tetu. 

Rate this item
(1 Vote)

Independente Digital TV

Tuir ami iha Twitter

Kalendariu Notisia

« May 2024 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31