Mudansa ne’ebé sei akontese iha nivel xefia. Kay Rala Xanana Gusmão, sai kandidatu forte hodi asume kargu Primeiru Ministru no Taur Matan Ruak, tun ba Vise-Primeiru Ministru. Maski nune’e, ba kargu nivel ministru sira nian seidauk iha serteza.
“Kontinuasaun husi senáriu retira proposta OJE 2020 husi PN maka, Maun Boot Xanana sei fila-fali ba Primeiru Ministru”, dehan fonte husi AMP laran ne’ebé lakohi publika ninia identidade.
Nia hatutan, Xanana fila-fali ba Governu nu’udar pedidu husi maioria diplomata internasionál sira ne’ebé husu atu eis-Prezidente Repúblika ne’e asume hikas kargu Primeiru Ministru.
Atu fila ba kargu ne’e, Xanana Gusmão rasik mós hatudu ona ninia prontidaun hodi kontribui hikas ba Estadu liuhusi Governu.
Ne’e duni, tuir fonte ne’e, AMP tenke hahú halo ona negosiasaun atu Xanana bele ba fali kargu Primeiru Ministru.
Mudansa ne’e mós atu responde ba desizaun konferénsia nasionál AMP nian, iha Novembru liubá, ne’ebé hasai rezolusaun ida hodi halo remodelasaun ba estrutura Governu.
Indísiu AMP ‘nakfera’ hahú husi audiénsia publika husi Parlamentu Nasionál kona-ba OJE 2020, ne’ebé abertamente Bankada CNRT hatudu pozisaun rejeita OJE 2020 ho razaun montante boot liu.
Maski nune’e, razaun ne’ebé CNRT aprezenta nu’udar maneira ida oinsá bele halo mudansa ba estrutura Governu nian.
Separasaun iha bloku AMP fortifika liután husi diskusaun OJE 2020. Bankada CNRT sai ‘monok’ liu durante debate.
Hafoin diskusaun ne’e laiha dalan, bankada hotu-hotu sujere atu Governu retira proposta. Maibé, Bankada CNRT ho diplomasia hatete, desizaun hotu entrega ba Primeiru Ministru, maibé partidu ne’ebé aliadu Governu nian ne’e la aprezenta solusaun ruma ba Governu.
“Primeiru Ministru, ami entrega fila-fali ba ita boot. Kompeténsia ita boot nian tomak atu deside”, dehan Deputadu Bankada CNRT, Duarte Nunes.
Tuir fonte seluk husi AMP, senáriu loloos husi dinámika polítika ne’ebé la’o, la'ós iha orsamentu maibé oinsá maka bele lori hikas Xanana Gusmão ba kargu Primeiru Ministru.
Ne’e duni, problema la’ós iha estrutura ka montante orsamentu maibé oinsá bele halo mudansa ba estrutura governu. Ne’e duni, bainhira laiha mudansa Governu bele nakfera ka monu. Nune’e, loke dalan ba koligasaun foun no eleisaun antesipada.
