Koordenadór Ofisial Ligasaun Forsa Tarefa Sentru Integradu Jestaun Krize (SIJK) Dr. Rui Maria de Araújo hatete, komunidade sira tenke halo dieta nutritivu atu konsumu ai-han ne’ebé mak iha proteina, mineral, no vitamina.

“Konsumu na’an, ikan, modo tahan ne’e importante atu hasa’e ema nia imunidade, labele han etu maran no supermie,” dehan nia iha Sentru Konvensaun Dili, Segunda (20/04).

Maske nune'e, nia rekoñese katak, problema boot ne'ebé akontese iha komunidade nia leet mak balun laiha kbiit atu sosa hahan ne'ebé iha nutrisaun di'ak hodi konsumu.

Maibé, nia dehan, iha hahan lokal sira hanesan aifarina no fehuk ne'ebé iha nutrisaun di'ak no bele konsumu hodi hasa'e imunidade isin.

"Iha balun ne’ebé mak iha aifarina, fehuk ne’ebé mak nutritivu hodi konsumu maibé ba faan tiha sosa fali supermie mak han," dehan nia.

Tan ne'e, tuir nia, presiza iha asaun formasaun ba komunidade sira atu bele dezenvolve sira-nia koñesimentu hodi konsumu ai-han ne’ebé nutritivu.

"Hahan nutritivu ne’e iha komunidade nia leet ne’e iha kuantidade boot tanba ne’e uma-kain idak-idak presiza buka atu bele dezenvolve di'ak liu tan hodi konsumu," nia hatete.

Entretantu, portavoz SIJK ne'e mós kontinua husu ba komunidade sira atu tau atensaun nafatin ba ijiene pessoal, fase liman bebeik, mantein distansia sosial no distansia fiziku, no hela iha uma karik laiha nesesidade ne’ebé importante iha li’ur.