Portavoz SIJK, Dr. Rui Maria de Araujo hatete, señora isin rua na’in ida horisehik kalan (19/4), muda husi kuarentena Farol ba sala izolamentu HNGV nian atu hetan tratamentu husi médiku sira.

“Inan isin rua oras ne’e tama ona ba semana 37 ka fulan walu ona, nia muda ba HNGV tanba hatudu sintomas relasiona ho ninia isin rua, no sei hein hela prosesu ezaminasaun laboratoriu,”dehan nia, liu husi konferensia imprensa, segunda ohin, iha CCD, ohin.

Rui dehan, oras ne’e pasiente nia kondisaun di’ak hela, doutór espesialista sira oras ne’e akompaña hala nia hodi fó tratamentu.

Direitór Klinika HNGV, Flavio Brandao hatete, parte HNGV simu ona inan isin rua, oras ne’e iha hela sala izolamentu HNGV nian.

Pasiente ne’e transfere husi kuarentena Farol no tama iha HNGV horikalan.

“Inan isin rua ne’e nia kondisaun di’ak hela no oras ne’e besik atu partus,”dehan nia, liu husi telefone, ohin.

Flavio informa, pasiente oras ne’e iha médiku sira nia liman no hetan akompañamentu ho di’ak, ninia kondisaun saúde mós estavel hela.