Maski nune’e, Prezidente Parlamentu Nasionál, Arão Noe de Jesus Amaral dismente katak, osan rihun US$ 500 la’ós hanesan públiku nia hanoin katak osan ne’e atu fahe ba deputadu sira.

Maibé tuir nia, osan ne’e uza halo fiskalizasaun ba atividade hotu-hotu ne’ebé Governu ezekuta iha ninia mandatu konstitusionál.

“Iha programa lubuk ne’ebé Parlamentu Nasionál tenke halo to’o fin-du-anu inklui rekuperasaun ekonomia, tanba Parlamentu Nasionál nia-knaar la’ós atu aprova de’it, maibé atu aprova tenke hatene analiza no estuda buat sira ne’e tenke iha fiskalizasaun”, dehan Arão, iha Parlamentu Nasionál, horisehik.

Ne’e duni, nia husu públika katak osan rihun 500 ne’ebé aprova tokon $150 ba Covid-19 hodi hala’o atividade Parlamentu Nasionál nian hodi akompaña ezekusaun orsamentu inklui atividade ne’ebé governu implementa.

Maski nune’e, nia dehan, orsamentu tokon $150 Governu seidauk implementa, nune’e Parlamentu Nasionál sei husu komisaun ida-idak halo programa submete mai meza Parlamentu Nasionál, depois haruka ba sekretariadu junta programa mak foin ezekuta planu ezekusaun.

“Públiku lalika preokupa see osan la gasta fila-fali ba kofre Estadu no osan ne’e la tau iha Parlamentu Nasionál atu tau iha bolsu fahe ba malu ne’e laiha,” dehan nia.

Nia esplika, jestaun orsamentu úniku osan hotu-hotu tau iha Banku Sentrál pedidu tama depois baixa mak foin ba foti, tanba husu ba públiku interpreta informasaun la’ós osan tau ida-idak tau nia kofre hodi halo ne’e la loos.

Entretantu, nia mós husu sira hotu bele komprende see tiha rezolusaun nú 2/2020 iha Parlamentu Nasionál ne’ebé ko’alia kona-ba atividade PN tenke ida ne’e deskreve iha ne’ebá klaru iha rezolusaun atividade saida mak atu halo.