Ne’e duni, opozisaun iha Parlamentu Nasionál (PN) preokupa tebes ho esplorasaun portál Governu Timor-Leste nian ne’ebé ezekuta husi ema seluk iha rai li'ur.
Deputadu Bankada Partidu Demokrátiku (PD) Adriano do Nascimento hatete, asesór ne’ebé operasionaliza portál governu ne’e iha rai li'ur hodi atualiza notísia kona-ba governu nian iha portál ne’e.
Eis-Ministru Presedénsia Konsellu Ministru ne’e hatete, durante nia asume kargu ne’e kuaze besik tinan ida, nia rasik la koñese asesór ne’e.
Kona-ba asesór nia saláriu, kada fulan mak governu transfere ba nia-konta bankária hodi kontinua operasionaliza informasaun governu nian ba portál.
“Asesór ne’e operasionaliza portál governu kala kuaze tinan 10 resin ona iha de’it nasaun Béljika ne’ebá”, tenik nia, iha Uma Fukun PN, horisehik.
Nia lamenta, tanba asesór ne’e iha de’it rai li' ur, informasaun nasaun nian ne’e tenke ba iha estranjeiru mak mai fali iha Timor. Ne’e hatudu servisu ne’ebé laiha efisiénsia no efikásia.
Governu maioria tenke halo ona revizaun haruka asesór mai iha Timor hodi oporasionliza portál ne’e, atu haruka timoroan balun akompaña bainhira servisu remata timoroan rasik bele kaer rasik.
Iha fatin hanesan, Deputadu FRETILIN, Joaquim dos Santos hatete, tuir loloos governu ne’e labele rekruta tan asesór internasionál barabarak iha fulan tolu nia laran hodi gasta osan saugati.
“Tenke hahú loke ona konkorrénsia públiku ba kargu asesór, atu timoroan sira mós bele asesu, tanba ita nia ema rasik mós agora matenek barak loos ona”, dehan nia, iha Uma Fukun PN, horisehik.
Hataan ba kestaun ne’e, Ministru Presedénsia Konsellu Ministru, Hermenegildo ‘Agio’ Pereira hatete, kuandu ministru ida simu pose, iha estrutura inklui kedas ho asesór sira tuir programa ne’ebé definidu ona ho filozofia ida kontinuidade ne’ebé mai husi governu anteriór nian.
Atu kore-aan husi dependénsia ba asesór internasionál pertinente tebes, maibé iha Planu Estratéjiku Dezenvolvimentu Nasionál (PEDN) husi 2011 to’o 2030 ne’e Timor hakarak atu atinji meta dezenvolvimentu ho médiu ekonomia, tanba ne’e presiza asesór sira nia akompañamentu.
