Administradór Munisipál Atauro, Domingos Soares hatete, total fámilia uma-kain iha munisipiu refere hamutuk 2.850, ne’ebé mai husi suku lima hanesan, Suku Berau, Beloi, Bikeli, Vila-Maumeta no Makili.
Husi númeru familia uma-kain ne’e, metade mak asesu ona ba bee moos ne'ebé kanaliza husi bee matan rua iha Suku Berau.
"Dalabarak ema hotu dehan Atauro be laiha ou bee menus, maibé ita iha bee matan boot rua ne'ebé ida iha Berau, kanalizasaun ne'e to'o ona iha Bikeli no tempu balun sei fornese ba Beloi,”dehan nia ba Jornalista INDEPENDENTE iha salaun Parokial, Vila-Maumeta, kuarta (15/03).
Nia dehan, metade husi familia uma-kain iha suku lima ne’ebé mensiona, seidauk asesu ba bee moos tanba ho razaun sira hela iha foho leten entaun bee ne'ebé husi bee matan labele sa'e.
Maibé dadaun ne'e, ekipa sira halo hela estudu viabilidade, no planu hela atu junta bee matan boot rua ne'e hodi bele distribui ba komunidade sira ne'ebé seidauk asesu bee moos, ne’ebé sei finansia husi Fundus Espesial Dezenvolvimentu Atauro (FEDA).
"Iha komunidade balun mak seidauk asesu ba bee ne'e, tanba sira hela iha foho leten, bee matan iha fali foho okos entaun labele sa'e ba leten, tan bee menus" tenik nia.
Ba kestaun ne’e, Administradór haktuir, Bee Timor-Leste, Empreza Públiku (BTL,E.P) kontrata ona ho kompaña ida hodi halo melloramentu ba sistema fornesimentu bee moos iha Atauro, liliu iha área Makili mai Vila-Maumeta hafoin ba iha Bikeli.
