Antes ne’e, iha ona informasaun MUTL sei uza oportunidade halo asaun protesta iha Santa Cruz, inklui atu hamosu Masakre 12 Novembru ba daruak.

Husi informasaun ne’e, Segundu Komandante PNTL Munisípiu Dili, Superintendente Asistente Euclides Belo hateten, Polisia haforsa vijilánsia hodi asegura seguransa iha serimónia ne’e.

Nia dehan, 12 Novembru nu’udar Loron Nasionál Juventude Loriku Asuwa’in, polisia hanesan ajente seguransa Estadu prontu fó apoiu tomak. Tan ne’e, laiha asaun seluk mak atu mosu iha fatin Santa Cruz.

Maski MUTL sira marka prezensa iha Santa Cruz, maibé Polisia hamutuk ho komisaun organizadora parte seguransa nian sei la fó fatin ba sira.

“Ita rona informasaun MUTL atu halo ninia asaun iha Santa Cruz. Tanba ne’e, ita la fó fatin no trava sira ninia prezensa”, tenik Euclides, iha edifísiu Komandu Polisia Kaikoli, horisehik.

Alende ne’e, Fernando Carvalho Seguransa Komité 12 Novembru hateten, prezensa estudante MUTL nian iha serimónia ne’e la sai preokupasaun ba komité. Maibé rona sira atu halo asaun inklui mós hakarak hamosu 12 Novembru daruak iha Santa Cruz, ne’e mak komité hamutuk ho Polisia halo kedas intervensaun.

“Ami la fó lisensa ba sira atu tama ba laran maski loron ne’e mós sira nian. Ami tenke trava sira atu labele prejudika serimónia ne’e”, tenik nia.

Entretantu, observasaun jornalista Tomé Amado iha terrenu, hare duni grupu movimentu akademista ninia prezensa hela de’it iha resintu Eskola Portugeza Dili oin. Sira la hetan lisensa atu tama to’o laran.

Bainhira tenta atu konfirma, maibé reprezentante MUTL la prontu ho razaun sira hein atu halo de’it protesta liu husi konferénsia imprensa.

Nune’e, membru efetivu ne'ebé komandu koloka iha komemorasaun ne’e mai husi Polisia Forsa Rezerva, Batallaun Orden Públiku (BOP) Polisia Tránzitu inklui mós Polisia Militár (PM).

PR Lú Olo Konsidera MUTL La Sala

Entretantu, Prezidente Repúblika (PR), Francisco Guterres ‘Lú Olo’ konsidera MUTL ne’ebé iha semana kotuk halo manifestasaun hasoru membru Parlamentu Nasionál kona-ba kestaun sosa Prado ne’e la sala.

“Estudante sira la sala tanba konstituisaun garante direitu ba espresaun ninia ne’ebé hola parte direitu sidadaun hotu-hotu ninia. Ne'e duni joven sira la sala bainhira sira halo demonstrasaun husu ba órgaun soberania sira saida maka hanesan sira-nia aspirasaun”, dehan nia, iha Semitériu Santa Cruz, horisehik.

Nia dehan, estudante lubuk ida maka polísia kaptura ona, tan ne’e hotu-hotu hein investigasaun atu hatene naksala iha parte ne’ebé.

“Presiza halo apuramentu ba faktu sira ne’ebé akontese no ida ne’ebé la akontese durante estudante sira halo manifestasaun iha sira-nia kampu. Se la akontese entaun sira la sala”, dehan PR Lú Olo.

Iha semana kotuk, polísia konsege kaptura estudante hamutuk ema na’in 22 no oras ne’e iha hela sela preventiva, tanba tuir informasaun katak estudante hirak ne’e ultrapasa distánsia metru 100 ne’ebé lei manifestasaun prevé.

Estudante hirak ne’e ezije PN atu kansela sosa karreta Prado ba deputadu foun sira, maibé prefere uza de’it karreta tuan sira ne’ebé antes ne’e membru PN sosa tanba kondisaun sei di’ak hela.