Saudozu hakotu iis iha ninia rezidensia Fatuhada, Segunda (12/11), maizumenus tuku 15:00 lokraik. Iha momentu hanesan povu Timor-Leste selebra loron Masakre Santa Cruz.
Tuir informasaun husi família saudozu ne’ebé lakohi temi naran hateten, L-4 hetan atake iha Sesta (9/11), maibé família sira la konsege lori ba ospitál no hili dalan tratamentu saúde iha uma.
Antes ne’e saudozu halo ona tratamentu dala rua iha Singapura, maibé la konsege rekupera 100% saúde saúde nian. Depois kondisaun di'ak fila mai Timor dala ruma hetan atake.
Saudozu antes ne’e asume kargu nu’udar vise-reitór Universidade Dili (UNDIL) no mós eis-Sekretáriu Estadu Asuntu Veteranu iha VII Governu Konstitusionál.
L-4 hetan atake moras makaas dezde asume kargu iha Governu, nune’e konsege evakua ba tratamentu saúde iha ospitál Elisabeth Singapura, iha 2017 no fila hikas mai ho kondisaun di'ak iha inisiu 2018.
Bainhira sei asume kargu Sektáriu Estadu André da Costa Belo, iha programa atu hadi'a jardín Herois da Patria Metinaru, maibé programa hirak ne’e la konsege ezekuta tanba hetan moras no mós governu la konsege dura to’o tinan lima.
