Komante Jeral Polisia Nasionál Timor-Leste, Komisariu Julio da Costa Hornai hatete, bainhira kampañia militante no simpatizante hothotu tenke uza kapasete no motor ida tenke ema na’in rua mak sa’e.

Se bainhira la tuir regra tranzitu ne’e, nia dehan, PNTL sei prende patrimoniu sira ne’ebé uza iha kampaña.

“Hakarak ka lakohi (tenke) tau kapasete iha tempu kampañia. Motor tenke ema na’in rua de’it mak sa’e, ne’e regras, tenke tuir regras. Kuandu see mak viola ona, ida ne’e tenke lori ba prosesu,” deklara Komisariu Julio ba jornalista sira hafoin hasoru malu ho Prezidente Repúblika Taur Matan Ruak iha Palasiu Prezidensial, Aitarak-Laran, horisehik.

Entretantu, tuir kalendariu ba eleisaun Prezidensial ne’ebé públika iha Jornál da Repúblika, iha 3 Marsu 2017, kandidatu Prezidente Repúblika sira ne’ebé rejistu ona sei hala’o kampaña.

Ba periodu kampaña, Komisariu Julio husu ba militante no apoiante sira atu tenke respeita malu.

Nia dehan, PNTL sei kordena ho Sekretariadu Tekniku Administrasaun Eleitoral (STAE) no Komisaun Nasional Eleisaun (CNE) hodi koalia kona-ba regra kampaña eleisaun nian.

“Ami sei kordena ho STAE no CNE par depois kalendariu kampañia ne’e ita bele entende malu, regras balun tau iha ne’eba,” dehan Komisariu Julio.

Tuir nia, presiza iha regras no medidas ne’ebé forte ba kampañia nune’e ema bele respeitu ema seluk nia direitu.

“Ita tenke respeita malu, ida ne’e mak ita sei tau regras ne’e,” katak nia.

 Kona-ba enkontru ho PR Taur, Komisariu Julio dehan, nia parte aprezenta seguransa rai laran.

“Aprezenta ba Prezidente (Repúblika) seguransa jeral iha rai laran,” dehan Komisariu Julio.

Nia haktuir, PR Taur apresia ho serbisu Polisia Nasionál Timor-Leste (PNTL) durante ne’e.