Komandante PNTL Munisipiu Dili Superentindente Xefe Henrique da Costa hatete, durante implementasaun estadu emerjensia, Komando PNTL Dili, liu-liu parte PolTraz nian, la hatama reseita ba kofre estadu, tanba la hala’o atividade checkpoint.

Maibé, nia hatete, liu tiha periodu ida ne’e, PolTraz konsege rekolla osan hodi hatama ba kofre estadu.

“Ha’u hakarak hatete hanesan ne’e, durante Estadu Emerjensia ita la aplika serbisu ida ne’e, maibé hafoin estadu emerjensia ramata, iha semana rua nia laran ita-nia (Polisia) Tranzitu hatama reseita $24 mill ba iha kofre estadu,” dehan Herique iha Salaun Autoridade Munisípiu Dili Matadoru, Segunda (06/07).

Ba kritika seluk husi PM kona-ba viaturas ne’ebé butuk iha edifisiu PNTL Dili, Komandante ne’e dehan, ba futuru nia parte sei tenke halo komunikasaun no koordenasaun ho Ministériu Públiku (MP) atu bele haree kestaun ida ne’e.

“Ita mós lakohi atu rai hela evidensia sira ne’e hanesan ai-funan hodi infeita ita-nia edifisiu,” dehan nia.

Tuir nia, viaturas hirak ne’ebé rai iha edifisiu PNTL nu’udar evidensia, tanba ne’e presiza koordena ho MP atu foti desizaun ruma.

“Iha ne’eba ita haree evidensia barak, buat barak ne’e mai kedas husi United Nations (UN) nia tempu, agora see mak bele deside ida ne’e? parte polisia labele deside, polisia aprezenta ba iha Tribunal ho Ministériu Públiku atu hein desizaun,” dehan nia.