Munisipiu Covalima nudar area ne’ebé bandu ema tama-sai (Lockdown) relasionadu transmisaun lokal husi moras Covid-19, bazeia ba Dekretu Prezidente Republika numeru 15/2021 iha loron 1 fulan marsu.
Tuir Sekretariu Jeral Uniaun Agrikultura Covalima, Bendito Amaral Barros hanesan mós observadór iha terrenu, hateten PNTL nafatin halo pasa-revista ba transporte sira hanesan dokumentus transporte nian ho kartaun eleitoral iha postu administratiu 5 hanesan Maucatar, Fatululik, Fatumea Fohorem no Tilomar.
“Situasaun Covid-19 iha munisipiu Covalima no serka sanitaria ho nune’e ita nia Polisia Nasional Timor-Leste sira mós halo kontrolu maximu ba ita nia komunidade sira, atu nune’e oinsa halo tuir regras estadu emerjensia ne’e iha ita nia munisipiu rasik,”dehan nia liu husi telekonferensia, iha salaun FONGTIL, Kaikoli Dili, Kuarta (03/03).
Aleinde ne’e, servisu saude munisipiu Covalima nafatin halo teste masal ba komunidade sira iha area fronteira no halo teste ba loja na’in sira inklui negosiante sira iha Suai.
Antes ne’e Sala Situasaun Sentru Integradu Jestaun Krize (SS-SIJK) desloka membru Forsa Unidade Teritorial kompostu husi Unidade Patrullamentu Fronteira (UPF), Unidade Espesial Polisia (UEP/COE) no FALENTIL-Forsa Defeza Timor-Leste (F-FDTL) hamutuk na’in 150 iha loron 1 fulan marsu no iha loron 2 fulan marsu tinan 2021 SS-SIJK desloka tan membru Polisia Nasional Timor-Leste (PNTL) hamutuk 40 ba Covalima atu kontrola komunidade sira.
