“Komunidade barak mak seidauk halo tuir regras Estadu Emerjensia (EE) tanba komunidade sira la uza maskra bainhira halo movimentu iha fatin públiku, no komunidade barak mak la tau bee ho sabaun iha uma oin,”dehan Sekretariu Jeral Uniaun Agrikultura Covalima, Bendito Amaral Barros hanesan mós pontu vokal husi Forum Organizasaun Naun Governmental Timor-Leste (FONGTIL), liu husi Telekonferensia iha salaun FONGTIL (3/3)

Governu aprova ona medidas prevensaun moras Covid-19 bazeia ba Dekretu Prezidente Republika numeru 15/2021 iha loron 1 fulan marsu.

Tuir medidas mak mantein bandu deslokasaun entre munisipiu seluk ba munisipiu Covalima, hahu oras 00:00 loron 4 fulan marsu to’o oras 23: 59 loron 2 fulan Abril tinan 2021, distansia sosial kuaze metru 1.5, uza maskra, fase liman bebeik, labele sai bainhira laiha atividade importante iha liur no kontinua kuidadu an nafatin.

Entretantu membru F-FDTL no PNTL mós kontinua maximiza seguransa iha liña fronteira Munisipiu Covalima liliu iha area terrestre entre Covalima, Bobonaro no Atambua.

Entretantu movimentu komunidade iha Vila laran mós hahú menus, no movimentu husi postu administrativu 5 ne’e ba suai vila taka, movimentu transporte Suai-Dili mós taka, no atividade eskola paradu.

Tuir observasaun pontu vokal FONGTIL iha terrenu katak, parte seguransa sira mós maximiza halo pasa revista ba movimentasaun transporte tama-sai Covalima, no aperta liña fronteira terrestre hodi kontrola ema illegal sira tama-sai.