Xefe Departamentu Tranzitu Seguransa Rodaviariu Nasionál (DTSRN), Superintendente Assistente Polísia Luis da Costa informa, prosesu rejistu ba motor illegal ne’ebé sirkula iha teritoriu Timor-Leste remata ona.
Daudauk ne’e, nia dehan, nia parte submete ona lista ba Ministeriu Transporte Komunikasaun (MTK) hodi bele foti desizaun.
"Ita hetan orientasaun husi Ministériu Transporte Komunikasaun. Iha faze dahuluk ita rejista motorizada hamutuk 4.774, maibé iha Munisípiu balun la konsege rejista, tanba ne’e kontinua ba iha faze daruak, entaun ita loke ba faze daruak konsege kobre hotu munisipiu sira ne'e, rejista tan motor 8.865,” informa Xefe DTSRN ba jornalista sira iha edifisiu Ministeriu Transporte Komunikasaun, Kaikoli, Segunda (07/10).
Tuir nia, bainhira seidauk iha desizaun husi MTK, motor nain sira ne’ebé rejista ona labele uza sira-nia motor hodi halo movimentu.
Nia hatutan, bainhira sidadaun sira lori sira-nia motor ba rejistu, pesoal polisia ne’ebé halo rejistu informa kedan katak hafoin rejistu sira labele uza motor refere hodi halo movimentu molok hetan legalizasaun.
“Kuandu rejista ona fila ba uma labele halo sirkulasaun ilegal bainhira seidauk hetan autorizasaun husi Governu atu legaliza motor sira ne'e atu hetan dokumentu legal.”
"Maibé iha sidadaun sira balun la rona, bainhira ita halo check point mak hetan motor sira ne'e kontinua sirkula ilegal ami nafatin aplika sansaun koima ba sira atu selu iha banku,” dehan nia.
Tan ne’e, nia afirma, dalan di’ak liu mak motor sira ne'e para di'ak iha fatin hodi hein desizaun Governu. Bainhira iha ona orientasaun ba prosesu tuir mai no hetan ona dokumentu legal mak foin bele halo sirkulasaun.
Iha fatin hanesan, Diretora Nasionál Transporte Terrestres (DNTT), Maria Antónia hatete, Polísia Tranzitu hamutuk ho ekipa tekniku aprezenta ona lista motor illegal atu hetan desizaun defenitiva husi nivel altu.
"Sim, ohin ita halo enkontru jerál ida hamutuk ho Diretor Jerál Ministériu Transporte Komunikasaun ho Polísia Nasionál Timor-Leste husi Departamentu Tranzitu Seguransa Rodaviariu Nasionál, atu mai entrega lista kona-ba motorizada sira ne'ebé durante ne'e halo sirkulasaun ilegal iha territóriu Timor-Leste,” dehan nia.
Polísia Tranzitu sira halo ona esforsu hodi rejista hotu motor sira ne'ebé laiha dokumentu, no prosesu ba oin sei hein desizaun nivel altu husi MTK.
"Ita hahú ona halo prosesu aprezenta relatóriu ba Ministeriu Transporte Komunikasaun atu hetan desizaun ida nivel altu ba transporte motor sira ne'e,” dehan Maria.
