Deputadu Bankada Partidu Demokrátiku (PD), Mariano Assanami Sabino hatete, haree akontesimentu iha Likisá no Ai-Mutin, joven ne’ebé mate ne’e hanesan laiha valór.

“Husu ministru defeza no seguransa katak operasaun polisia nian to’o iha ne’ebé? Operasaun intelijénsia to’o ona iha ne’ebé? Tanbasá maka situasaun ne’e rai-laran kontinua nune’e,” tenik nia.

Fó hanoin ba polisia atu mantein seguransa ho di'ak hodi mantein estabilidade, asegura ema la’o ho seguru.

“Situasaun ne’e hatudu ho evidénsia forte katak ita la kontrola situasaun, fraku no frajil,” dehan nia.

Iha fatin hanesan, Deputadu Bankada CNRT, Ricardo Baptista, husu joven sira atu labele kontinua estraga malu, maibé hadomi malu.

Hataan ba kestaun ne’e, Ministru Reforma Lejizlativa no Asuntu Parlamentár (MRLAP), Fidelis Manuel Leite Magalhães hatete, Primeiru Ministru hato’o ona orientasaun ba ministru defeza no seguransa atu haree ba kazu ne’e.