Diretór Ezekutivu Fundasaun Mahein (FM), João Almeida hateten, polisia iha momentu hanesan ne’e laiha seriedade atu kontrola situasaun, tanba antes kazu ne’e mosu komisaun organizadora informa ona ba polisia relasiona ho sinál violénsia ne’ebé atu akontese.

Nia hatutan, akontesimentu ne’e atuasaun polisia falla, liuliu servisu prevensaun, tanba ho movimentu boot no informasaun ne’ebé komisaun organizadora hato'o ba polisia tuir loloos akompaña ho di’ak hodi evita mosu konfrontu.

“Movimentu ida hanesan horisehik ne’e la'ós fasil atu kontrola no polisia tenke akompaña movimentu ne’e hodi bele asegura”, dehan João.

Nia dehan, Servisu Intelijénsia Polisia (SIP) la funsiona iha situasaun ne’e. Tuir loloos sira hatene ona informasaun sira ne’e antes hodi informa ba komandu atu bele foti medida seguransa ne’ebé di'ak.

“Liga ba servisu intelijénsia sira ida ne’e ita falla. Loloos ne’e ita prevene antes ona”, tenik nia.

Iha fatin hanesan, Komandante Operasaun PNTL, Superintendente Xefe Pedro Belo hateten, PNTL simu duni pedidu husi komisaun organizadora, maibé iha pedidu la hakerek organizasaun nia-naran, hakerek de'it ema sira ne’e sei mai tuir misa inaugurasaun gruta iha Ai-Turi Laran, Taibesi-Dili.

Nia dehan, akontesimentu ne’e mosu polisia iha, maibé konxiénsia fila ba ema hotu-hotu, tanba polisia la’ós atu ba fó seguransa ba ema ida-ida, maibé polisia ne’e halo seguransa ba povu tomak.

Pedro esplika, momentu ne’e akontesimentu lalais liu, polisia ne’ebé iha labele responde, tanba sira halai iha oin, entaun iha ekipa seluk ne’ebé responde maibé iha ona vítima.

Hataan ba ida ne’e, Ministru Defeza no Seguransa, Filomeno Paixão hateten, polísia labele iha fatin hotu-hotu tanba iha fatin hotu presiza prezensa polisia nian.