Deputada Bankada CNRT, Virginia Anabela hatete, lei protesaun labarik PN aprova ona iha tinan kotuk, maibe asuntu labarik kontinua fa'an sasan iha estrada ibun ka loja sira.

Nia afirma, tinan naruk entidade hotu-hotu preokupa ho situasaun labarik sira iha dalan ninin, tanba bele fo risku ba sira-nia vida, tanba ne'e espera katak, parte INDDICA tutela iha MSSI bele resolve asunto labarik sira.

“Kuandu sira fa'an sasan iha tempu kalan ita la hatene saida mak bele akontese ba labarik sira liu-liu feto sira ne'e, ema ida mai ho kareta nia bele bosok tia labarik feto ne'e ho liafuan ha'u sosa hotu alin nia sasan maibe alin sa'e kareta ha'u lori ba uma, ita bele imajina saida mak akontese iha kareta laran,” dehan iha plenaria PN, horiseik (22/01).

Nia hatutan, iha tempu naruk ema hotu-hotu preokupa ho situasaun ida ne'e, espera katak bele rezolve situasaun ida nee, tanba labarik sira daudaun nee iha situasaun neebe perigu nia laran.

“Tanba ne'e mak husu ba institutu nasional defeza direitu labarik tutela iha Ministériu Soliedariedade Sosial no Inkluzaun favor ida tau atensaun ba labarik sira nee, servisu hamutuk ho Polisia Nasional Timor Leste (PNTL) para depois organiza didiak alin sira nee,” nia rekomenda.

Molok ne'e, Prezidente Intituto Para a Defeza Direitu dos Criancas (INDDICA, IP, Dinorah Granadeiro, hateten, labarik sei kontinua faan sasan iha dalan ninin, kauza barak liu maka ekonomia familia neebe mak ladun iha rendimentu diak atu bele susenta sira nian familia.

“Tanba nee, dala barak ami koalia ho labarik sira nee, balun ami koalia ho sira nian inan aman, ami husu tanba saida mak imi tenke obriga imi nia oan sira atu halo servisu sira nee, sira dehan dala ruma ami faan, maibe komunidade jeral ladun hakarak sosa sasan neebe ami faan, ezemplu hanesan forai sona, mantolun daan, maibe labarik sira mak faan komunidade barak mak sosa, tanba hanoin, entaun sira uza oportunidade nee atu hetan rendimentu ho labarik sira,” dehan nia.

Nia hatete, maibe labarik sira nee maioria barak mak eskola, no sira dader ba eskola fila mai faan sasan, i balun lokraik mak eskola dader faan sasan.

Tanba nee, sira komisaun dala ruma atu ba foti labarik sira nee atu lori fila ba sira nian familia, maibe sira mos hetan difikuldade tanba laiha lei ida mak koalia espesífiku ba asuntu ida nee, bele kria polémika iha sosiedade nia leet.