“Nune'e, proposta númeru 147 hodi hasa’e subsídiu ba idózu kada fulan dolar amerikanu $50, passa ho rezultadu afavór 32, kontra 26 no abstensaun hitu (7),” dehan Prezidente Parlamentu Nasional Aniceto Longuinhos Guterres, anunsio liu husi Plenariu iha Parlamentu Nasional, kinta ne'e (09/12).
Enkuantu, iha Proposta nú 147 ne'e, aprezenta husi proponente Deputadu Mariano Assanami Sabino husi Partidu PD no Antonio de Sá Benevidas husi Partidu PUDD.
“Ami hanoin katak tempu to’o ona husi osan ne’ebé ita nia maluk defisiénte no idózu sira simu $30 kada fulan, se bele aumenta tan $20 halo $50 kada fulan,” dehan Deputadu proponente, António de Sá Benevides.
Nia hateten, Deputadu barak ba hala’o fiskalizasaun sira halo mós vizita kontaktu eleitorál dala ruma iha mós oportunidade vizita defisiente ho ferik-katuas sira ne’ebé iha área rurál balun kondisaun moris triste tebes.
Tanba ne’e, ho proposta ne’e atu aumenta subsídiu refere hodi fó kondisaun di’ak ba defisiente no idozu sira.
Ho nune’e, iha aditamentu hosi artigu 20 Kona-ba apoiu subsidiu ba idozu no invalides kria husi dekretu lei 19/2008, iha Loron 19 juñu, iha tinan 2022 montante dolár amerikanu $50 kada fulan.
Nune'e, iha despeza orgaun servisu administrasaun sentrál títulu dotasaun todo Governu kategória despeza bens servisu, programa ho kódiku 980 kona-ba igualidade jéneru no inkluzaun sosiál, dotasaun inisiál millaun $73 alterasaun aumenta tan millaun $23.520.000 no dotasaun finál sa’e ba millaun $96.520.000.
Tanba ne'e, sei tau ba títulu tabela 4 ba reseita seguransa sosiál iha kategória despeza transferénsia orsamentu administrasaun sentrál rejime naun kontributivu.