Nune’e, orsamentu ne’e atu hodi konstrui tan uma kbiit laek (UKL) 10, kada suku iha teritoriu laran tomak.
Parlamentu Nasional aprova proposta númeru 54 mai husi Proponente Deputadu Francisco de Vasconselos, Abel Pires da Silva, António Verdiál de Sousa, Maria Angélica Rangel no Antoninho Bianco.
"Nune'e votasaun ba proposta 54 ne'e passa, ho rezultadu a-favór 47, kontra 0 no abstensaun 13", dehan Prezidente Parlamentu Nasional Anicetu Longuinhos Guterres, anunsio liu husi Plenariu iha Parlamentu Nasional, kinta horseik (09/12).
Tuir Deputadu Proponente Fransicisco de Vasconselos hateten, prosposta ne'e importante tebes tanba Governu nia tulun diretamente ba populasaun liu-liu iha suku no aldeia ne’ebé merese hetan atensaun husi Estadu.
"Tanba ne’e, ami hakarak hasa'e tan envez uma tolu maibé uma 10 kada suku, nune’e proposta ne’e pasa Governu konkorda liu-liu oinsa hadia mekanizmu implementasaun,”dehan Deputadu Francisco.
Nia dehan, iha tinan uluk Governu deside kada suku konstrui uma tolu, maibé haree ba implementasaun mezmu ho aplikasaun estadu emerjénsia ninia ezekusaun to’o hotu.
Enkuantu, iha proposta númeru 54 ne'e mosu hafoin komisaun rona esplikasaun husi Ministru Administrasaun Estatál (MAE) kona ba ajuda harii uma ba populasaun sira ne’ebé laiha kbiit.
Nune'e, programa ne’e konsentra iha Planu Estratéjiku Dezenvolvimentu Nasionál (PEDN) tinan 2011 to’o 2030, ne’ebé rekoñese povu Timor-Leste nia aspirasaun atu kria nasaun ida ne’ebé forte, prosperu no moris di’ak ba sidadaun.
Iha fatin hanesan Ministru Administrasaun Estatál (MAE), Miguel Pereira de Carvalho, hateten iha tinan fiskál 2021 MAE liu husi PNDS konstrui UKL hamutuk 1.254, ne’ebé nia progresu iha munisípiu hotu la’o diak no hetan apresiasaun boot husi komunidade rasik hetan benefísiu direta.
Ho nune'e, iha tinan 2022, Governu liuhusi Ministéiru Finansa aloka orsamentu besik dolar amerikanu tokon U$8 atu kontinua programa refere, maibé ida ne’e la to’o atu hala’o iha suku hotu-hotu, tanba redusaun 75% husi orsamentu ne’ebé aloka iha tinan ida ne’e.
“Deputadu sira propoin tan osan hamutuk tokon U$63,600. ba MAE liu husi PNDS hodi bele implementa programa Uma Kbiit La’ek iha tinan 2022, nune’e aumenta uma 10 kada suku no Governu prontu atu implementa programa ida ne’e,” nia dehan.
Enkuantu iha Proposta númeru 54 títulu MAE iha kategória ba despeza transferénsia públika ho programa kódiku 025 kona-ba desentralizasaun administrativa no podér lokál, dotasaun inisiál $21.118.045 ho alterasaun aumenta $63,600.000, nune’e dotasaun finál sa’e ba $84,718,045.
Nune'e, iha orsamentu ne’e tau iha programa desentralizasaun administrativu no podér lokál, sub-programa dezenvolvimentu lokál ho atividade jestaun Programa Naisonál Dezenvolvimentu Suku (PNDS).
Entretantu, iha programa oitavu Governu Konstituisionál prioritiza kona ba abitasaun no bainhira Governu define atividade ne’e ho objetivu prinsipál garante moris di’ak sidadaun nian kontribui ba redús ki’ak.
Asistente Editor: Saturnina da Costa
