“Nune’e ho rezultadu votasaun OJE 2022 ba MAE passa ho valor a-favor 42, kontra 0 no abtensaun 18,” dehan Prezidente Parlamentu Nasionál, Aniceto Longuinhos Guterres Lopes, liu husi Plenaria, kinta horseik (9/12).
Ho nune’e, husi total osan ne'ebé iha hodi aloka ba saláriu vensimentu ho montante $3,670,598, bens servisu $7,447,288, kapitál menór $1,037,800, kapitál dezenvolvimentu $450,000 no transférensia públika $21,118,045.
Ho ida ne’e, osamentu ba MAE, sei finansia ba programa tolu, sub-programa lima no atividade 21.
Atu finansia programa tolu MAE nian iha desentralizasaun administrativa no podér lokál sei gasta $24,201,199, programa boa-governasaun no jestaun institusionál sei gasta $9,496,016 no igualdade jéneru no inkluzaun sosiál sei gasta $26,516.
Iha programa dahuluk ba MAE nian, kona ba desentralizasaun administrativa no podér lokál, nia objetivu médiu prazu garante ba implementasaun efetiva husi desentralizasaun administrativa no podér lokál.
Iha programa daruak ne'e rasik, ho nia sub-programa ba dezenvolvimentu lokál, atu bele halo atividade ba programa nasionál hosi dezenvolvimentu suku (PNDS) nian. Tanba hodi apoia ba administrasaun suku sira inklui apoia no koordena planeamentu ba dezenvolvimentu integradu munisipál (PDIM) nian.
Enkuantu, iha orsamentu ne'e MAE tau mós sub-programa kona-ba desentralizasaun administrativa poder lokal nian no presta mós asisténsia teknika ba Autoridade Adminitrativu Munisipál no finansas no mós patrimonio Munisipál nian.
Iha sub-programa daruak nian MAE halo jestaun ba aktividade finaseira no administrasaun ba lojistika nian no jestaun rekursus humanu, no mós atividade ba organizasaun no eventu sira.
Tanba ne'e, iha sub-programa ne'e halo mós aprovisionamentu no jestaun ba kontratu no mós jestaun ba sistema informasaun no komunikasaun.
Entretantu, MAE iha mós programa igualdade jéneru no inkluzaun sosiál, ho ninia sub-programa mak implementasaun ba NAP-GBV, ho nia atividade koordenasaun no apoia kapasitasaun ba autoridade lokál sira no líder komunitáriu sira iha área igualdade jeneru no inklusaun sosiál.
Asistente Editor: Saturnina da Costa
