“Kontribuisaun ne’e reprezenta kompromisu Estadus Unidus nian hodi hamri’ik hamutuk ho ami-nia parseiru Timoroan sira enkuantu ita hamutuk luta hasoru Covid-19,” hateten Enkaregadu Negósiu Embaixada Estadus Unidus Tom Daley, iha ambitu seremonialansamentu, sesta (10/12), iha Munisipiu Baukau.
“Ha’u hakarak hato’o obrigadu ba Governu Timor-Leste no Ministériu Saúde ba sira-nia parseria forte iha luta hasoru pandemia ne’e atu nune’e ita bele hahú rekuperasaun ekonómika no hari’i futuru ne’ebé seguru no prospéru liután ba ita-nia sidadaun hotu-hotu,”nia haklaken liu husi nia komunikadu imprensa ne’ebé Online Independente simu, sesta ohin.
Estadus Unidus liuhusi ninia Ajénsia Estadus Unidus ba Dezenvolvimentu Internasionál (USAID) no Komando Indo-Pasífiku Estadus Unidus halo parseria hamutuk ho Ministériu Saúde hodi haluan fasilidade izolamentu no kuarentena hodi hatán ba Covid-19.
Hanesan parte husi kontribuisaun Estadus Unidus nian, Estadus Unidus iha fulan Setembru 2021 anunsia ona asisténsia adisionál dolar amerikanu millaun $2.3 hodi ajuda Timor-Leste luta hasoru Covid-19 no haforsa seguransa saúde, inklui hari’i fasilidade saúde ba salva vida nian. Fundu ne’e fornese husi Misaun Estadus iha Timor-Leste liuhusi USAID no Komando Indo-Pasífiku Estadus Unidus nian, ho kolaborasaun husi Korpu ba Paz. Aspetu sira husi servisu ne’e hala’o daudaun iha kooperasaun ho the United Nations Children’s Fund (UNICEF).
Objetivu jerál maka atu hari’i Timor-Leste nia reziliénsia hasoru ameasa husi COVID-19. Apoiu finanseiru Estadus Unidus nian ne’e sei ajuda konstrui fasilidade izolamentu iha Baucau, haluan kapasidade Unidade Kuidadu Intensivu (ICU) liuhusi fornese unidade ICU móvel ida ba Ospitál Nasionál Guido Valadares no fornese bee moos ba iha Fasilidade Kuarantena Batugade nian.
Dezde pandemia ne’e hahú, Estadus Unidus serbisu ona hamutuk ho Governu Timor-Leste iha parte hotu hodi fornese vasina Pfizer 100,000 resin no osan liu millaun $5.9 iha asisténsia importante hodi luta hasoru COVID-19.
Estadus Unidus halo aprosimasaun kompreensivu hodi hapára pandémia ne’e iha mundu tomak, hamenus efeitu aat husi COVID-19 ba ema no sosiedade sira, no haforsa rekuperasaun iha nível globál.
