Iha debate OJE 2022 iha faze espesialidade ne’e, Deputadu sira aprova proposta númeru 45 ne’ebé aprezenta husi proponente Mariano Assanami Sabino, ho montante $258.110 ba tinan oin, hodi apoiu no atende nesesidade klínika Bairru Pite, Lanud.
“Nune'e, ho proposta 45 passa ho rezultadu votasaun a-favór 51, kontra 0 no abstensaun 14”, Presidente Parlamentu Nasional Anicetu Longuinhos Guterres anunsio liu husi Plenariu iha Parlamentu Nasional, kinta ne'e ( 09/12).
Entrentatu, Deputadu Assanami Sabino, hateten, osan ne’e sira hanoin katak horibainhira Ministru Finansas rasik esplika katak, iha osan ida ne’ebé hamutuk, bele transfere ba programa sira ne’e.
Nune'e, iha títulu servisu dotasaun tudo Governu, ba kategória despeza transferénsia públika, ho programa kódiku 983 kona-ba investimentu no diversifikasuan ekonómika, dotasaun inisiál iha $52.500,000 alterasaun hasai $258.110.
Tan ne'e, sei tau fali ba títulu servisu Ministéiru Saúde ba kategória despeza tranferénsia públika ho programa kódiku 805 kona-ba saúde iha dotasaun inisiál $10,998.800 alterasaun aumenta $258.110 nune’e dotasaun finál aumenta ba $11,256.910
Iha Justifikasaun husi proponente katak, klínika Bairru Pite, Lanud, fó ona nia kontribuisaun ida ne’ebé di’ak no kualidade tebes, durante ne’e hodi halo atendimentu ba populasaun Timor-Leste ne’ebé presiza tebes asisténsia médiku, liu-liu ba inan isin-rua ne’ebé presiza atendimentu ba partu nian, moras kankru sira ne’ebé presiza halo atendimentu intensivu.
Aliende, pasiente sira ne’ebé presiza baixa hodi halo kontrolu ida efisiente no rigorozu no seluk tan, maibé durante ne’e defisíl tebes ba iha rekursu orsamentu atu bele ba nesesidade hirak ne’e.
Enkuantu, Bankada Partidu Demokratiku propoin orsamentu adisionál ho montante $258.110 hodi aloka ba nesesidade atendimentu má nutrisaun no alimentasaun ba pasiente sira ho montante $85.600, nesesidade atendimentu ba maternal infantil, farmásia ho kankru ra'an ho montante $49.560 no ba nesesidade atendimentu funsionáriu klínika no reforsa instituisaun ho montante $122.950.
Entrentatu, Ministra Saúde, Odete Maria Freitas Belo, pronunsia katak Governu laiha rejeisaun ba iha proposta ba klínika Bairru Pite tanba orsamentu mai la fó impaktu ba tetu orsamentu.
